مەسعود بارزانی دەڵێ "کۆماری ئیسلامیی ئێران رۆڵی ئیجابی بینیوەو ناتوانین رۆڵی ئێران پشتگوێ بخەین لەشەڕی دژ بە داعشدا".

بارزانی لە هەڤپەیڤینێکیدا لەگەڵ کەناڵی سی ئێن ئێن، رۆڵی کۆماری ئیسلامیی ئێران و ویلایەتە یەکگرتووەکانی ئەمریکا لە شەڕی دژ بە چەکدارانی داعش بە گرینگ وەسفدەکات، بۆیە داوایان لێدەکات لەو پێناوەدا جیاوازییەکانیان وەلابنێن و شەڕی داعش بکەن.


سەرۆکی (ماوە بۆ درێژكراوە)ی هەرێمی کوردستان هەروەها پشتیوانیی خۆی بۆ ستراتیژییەتی باراک ئۆباما سەرۆکی ئەمریکا لە رووبەڕووبوونەوەی داعش دەربڕی و باسی لەوەشکردووە، کە هێرشی فڕۆکەکانی ئەمریکا کاریگەر بوون.

لە وەڵامی ئەو پرسیارەی ئایا پێشمەرگە نیازی هەیە بچێتە مووسڵ و لەوێ شەڕی داعش بکات، بارزانی دەڵێ: "ئەولەویەت بۆ ئێمە پاراستنی سنووری حکومەتی هەرێمی کوردستان و کەمینەکانە، بەڵام ئەگەر ستراتیژی هاوبەش هەبێت لەنێوان حکومەتی بەغداو هاوپەیمانەکان، ئەوا پێشمەرگە ئامادەیە شەڕی تیرۆر بکات لە هەر شوێنێک بێت".