ئەندامی سەركردایەتی پارتی دیموكراتی كوردستان، د. كەمال كەركوكی دەڵێت "داوا لە پەرلەمانتارانی ئازیز خوشك و براكانم لەسەرۆكایەتی و لە پەرلەمانی كوردستان دەكەم كە خێرابن و پەلە بكەن لە گرتنەبەری رێوشوێنی یاسایی بۆ راگەیاندنی سەربەخۆیی كوردستان".

سەرۆكی پێشووی پەرلەمانی كوردستان د.كەمال كەركوكی لە دیمانەیەكدا لەگەڵ ئاژانسی ئانادۆڵو داوایەك ئاراستەی پەرلەمانی كوردستان دەكات و دەڵێ:" داوا لە پەرلەمانتارانی ئازیز خوشك و براكانم لەسەرۆكایەتی و لە پەرلەمانی كوردستان دەكەم كە خێرابن و پەلە بكەن لە گرتنەبەری رێوشوێنی یاسایی بۆ راگەیاندنی سەربەخۆیی كوردستان، ئومێد دەكەم ئەو بەرپرسیارێتییە مێژووییەی لەسەرشانییانە جێبەجێی بكەن، چونكە ئێمە وەكو نەتەوە مافی خۆمانە بڕیار لەسەر چارەنووسی خۆمان بدەین و ئەوەش یەكێكە لەو مافانەی نەتەوەیەكگرتووەكانیش بە گەلانی دونیای بەخشیوە و عێراقیش ناتوانێ رێگریی لێ بكات."

كەمال كەركوكی هەروەها پێیوایە كورد بەگەڕانەوە و بەشداریكردنی لە حكومەتی عێراق ھەڵەی گەورەی كرد، دەشڵێ عەبادی لەمالیكی باشترنابێ بۆ كورد، پێشبینی ئەوەش دەكات پاش كۆنگرەی پاریس چەكی زیاتر بگاتە ھەرێمی كوردستان بۆ پاڵپشتیكردنی لەشەڕی دژ بە داعش.