پارێزگای هەولێر بڕیاریدا تونێلی پیرمام بە ڕووی شۆفێرانی بارهەڵگردا بکاتەوە تا رێگەی گونجاویان بۆ دیاریدەکرێت.
پارێزگای هەولێر دواینیوەڕۆی ئەمڕۆ شەممە ١١ی ئایاری ٢٠٢٤ لە راگەیەندراوێکدا ئاگادارى شوفێران و هاوڵاتییان دەکاتەوە کە لە پێناو بەرژەوەندى گشتی و کەمکردنەوەی ئاستەنگى هاتووچۆ و جموجۆڵ و جوڵەی بازرگانی، بڕیاردراوە بە کردنەوەی تونێلی پیرمام بە ڕووی هاتووچۆی بارهەڵگرەکان بە پابەندبوونیان بە کێشی رێگە پێدراو و بارنەکردنى کێشی زیادە کە لە ئێستادا زۆربەی رێگە سەرەکییەکان بە ڕووی هاتووچۆکردنیان داخراوە و بەشێک لە رێگە جێگرەوەکانیش گونجاونین، ئەو بڕیارە تا ئەوکاتەیە کە رێگەی گونجاویان بۆ دابیندەکرێت.
ئاماژە بەوەشکراوە، لە رۆژانی هەینی بۆ ماوەی (٢٤) کاتژمێر ناتوانن بە تونێلی پیرمام هاتووچۆ بکەن و لە بۆنە و پشووەکانیش رێگە پێدراونین.
هەروەها داواش لە شوفێرانی بارهەڵگر دەکەن لە پێناو پاراستنی گیانی هاوڵاتییان و سەلامەتی هاتووچۆ و رێگەوبانەکان پاندی رێکار و رێنماییەکان بن.