ڕابەری باڵای کۆماری ئیسلامی ئێران ڕایدەگەیەنێت" لە ماوەی ٥٠ ڕۆژی داهاتوودا هەڵبژاردنی سەرۆکایەتی کۆمار بەڕێوە دەچێت".
عەلی خامنەیی ڕابەری باڵای ئێران، ئەمڕۆ دووشەممە دوای گیان لەدەستدانی سەرۆک کۆمار و شاندی یاوەری ئەو وڵاتە، بۆ ماوەی پێنج ڕۆژ ماتەمینی گشتی لە ئێران ڕاگەیاند.
هەروەها خامنەیی ئاماژەی بەوەشکرد، بەپێی ماددەی (١٣١)ی دەستوور، محەمەد موخبیر ئیدارەی دەسەڵاتی جێبەجێکردن دەگرێتە ئەستۆ و دەبێت لەگەڵ سەرۆکی دەسەڵاتی یاسادانان و دادوەری ڕێکبکەوێت بۆ هەڵبژاردنی سەرۆکێکی نوێ لە ماوەی (٥٠) ڕۆژدا".
بەرەبەیانی ئەمڕۆ تەلەفزیۆنی فەرمی دەوڵەتی ئێران گیان لەدەستدانی ڕەئیسی و عەبدوڵڵاهیانی لە ڕووداوی کەوتنەخوارەوەی کۆپتەرێکدا ڕاگەیاند.
ئیبراهیم ڕەئیسی هەشتەمین سەرۆک کۆماری ئێرانە، لە ساڵی (٢٠٢١) بۆ جێنشینی حەسەن ڕۆحانی سەرۆک کۆماری ئێران هەڵبژێردرایەوە.