جێگیری سەرۆکی حکومەتی هەرێم لە چوارچێوەی سەردانەکەی بۆ دەڤەری راپەرین رایگەیاند" شتێک نەماوە بەناوی بودجەی سلێمانی و هەولێر، یەک بودجە و یەک داهات هەیە".
قوباد تاڵەبانی، جێگری سەرۆکی (ماوەبۆدرێژکراوەی) حکومەتی هەرێمی کوردستان لە رانیەوە قسەی کرد و رایگەیاند" چارەسەرکردنی کێشەی مووچە لەنێوان هەولێر و بەغدا، یارمەتیدەر دەبێت بۆئەوەی کێشەی مامۆستایانی وانەبێژ و فەرمانبەرانی گرێبەستیش چارەسەر بکرێن و گەشبینم لەوەی چارەسەر دەبێت".
قوباد تاڵەبانی وتیشی" شتێک نەماوە بەناوی بودجەی سلێمانی و هەولێر و یەک بودجە و داهات هەیە".
ئاماژەی بەوەشکرد کە لەگەڵ وەزارەتە پەیوەندیدارەکان لە پەیوەندیدان بۆ دابینکردنی بودجەی پێویست بۆ دەستپێکردنەوەی پرۆژەکان و ئەو پرۆژانەی دەخرێنەوە کار لەسەر بودجەی حکومەتی هەرێمی کوردستانە نەک لەسەر بودجەی پارێزگاکان.
لەبارەی هەڵبژاردنەوە باسی لەوەکرد چاوەڕوانن سەرۆکایەتی هەرێم وادەیەکی نوێ بۆ هەڵبژاردن دیاری بکرێت و پێناچێت گۆڕانکاری لە سیستمی هەڵبژاردن بکرێت.
جێگری سەرۆکوەزیرانی هەرێمی کوردستان لەبارەی تەواونەکردنی کارەکانی نەخۆشخانەی ٢٩١ قەرەوێڵەیی رانیە وتی" ئەگەری هەیە کێشەکانی چارەسەر بکرێن، هەندێک رێکاری ئیداری و یاسایی هەیە و دەبێ تێپەڕێندرێت و دەیکەینە ئەولەویەتی کارەکانمان".