ئەمڕۆ چوارشەممە وەزارەتی كشتوكاڵ و سەرچاوەكانی ئاوی هەرێم لە ڕاگەیەندراوێکدا ڕێكار و ڕێنوێنییەكانی سەربڕینی ئاژەڵی لە جەژنی قوربان بڵاوكردەوە.
لە بڵاوكراوەكەی وەزارەتی كشتوكاڵی هەرێمدا هاتووە" مەبەستی ڕێگریی لە بڵاوبوونەوەی نەخۆشیی تای خوێنبەربوون، بەڕێوەچوونی ڕێوڕەسمی قوربانی بە شێوازێكی تەندروست، لە پێناو بەرژەوەندیی گشتی و پاراستنی ژیانی هاووڵاتییان، دووپاتی دەكەینەوە پێویستە ئاژەڵەكان لە سەربڕخانەی فەرمی سەر ببڕێن".
ڕێنوێنییەكانی وەزارەتی کشتوکاڵی هەرێم بەمشێوەیەیە:
_ بە مەبەستی ڕێگریی لە بڵاوبوونەوەی نەخۆشیی تای خوێنبەربوون، بەڕێوەچوونی ڕێوڕەسمی قوربانی بە شێوازێكی تەندروست، لە پێناو بەرژەوەندیی گشتی و پاراستنی ژیانی هاووڵاتییان، دووپات دەكەینەوە پێویستە ئاژەڵەكان لە سەربڕخانەی فەرمی سەر ببڕێن.
_ لە ڕۆژانی جەژنی قوربان، سەربڕخانەكان بە ئامادەبوونی پزیشك و كارمەندی ڤێتێرنەری كراوە دەبن.
_ توندوتۆڵكردنەوەی ڕێكارەكانی پشكنینی پێش و دوای سەربڕینی ئاژەڵ و پشكنینی گۆشتی بەرهەم هاتوو.
_ پێویستە ئاژەڵەكە تەندروست بێت و هیچ نەخۆشییەكی نەبێت؛ گەنە (قڕنە) و مشەخۆری دەرەكی لەسەر نەبێت.
_هەر ئاژەڵێك دەرمانی چارەكردنی پێ درابێت، نابێت ڕاستەوخۆ سەر ببڕێت، بەڵكو پێویستە كاتی سەربڕین دوای بەكارهێنانی دەرمان، بەپێی ڕێنوێنیی پزیكشیی ڤێرتێرنەری و تایبەتمەندیی دەرمانەكە بێت.
_پێویستە لەسەر خاوەن ئاژەڵ پێش فرۆشتنی ئاژەڵەكانی (بۆ سەربڕین یان قوربانی) بۆ ماوەی نزیكەی سێ هەفتە هیچ جۆرە دەرمانێك نەدات بە ئاژەڵەكان و هۆڵی بەخێوكردنی ئاژەڵەكان بە دەرمانی تایبەت بڕشێنرێت و چارەسەری ئاژەڵە نەخۆشەكانی بكات.
_پێویستە كەسی قوربانیكەر (قەساب و هاووڵاتی) ڕێكارەكانی خۆپارێزیی لە كاتی سەربڕینی ئاژەڵ و گۆشت ئامادەكردن پێڕەو بكەن، بەتایبەت بەكارهێنانی دەستكێش، جزمە و بەركۆش.
_لە كاتی گواستنەوەی گۆشت ڕەچاوی پلەی گەرمی بكرێت.
_پێویستە گۆشتەكە ١٢-٢٤ سەعات لە ساردكەرەوە هەڵبگیرێت و پاشان بەكار بهێنرێت.
_فڕێنەدانی پاشماوەی ئاژەڵە سەربڕاوەكە لەسەر شەقامەكان.