ئێوارەی ئەمڕۆ چوارشەممە ١٢ی حوزەیرانی ٢٠٢٤ لە نزیک بازاڕی سنووری پارێزگای دهۆک ڕووداوێکی تەقەکردن ڕوویدا و بەهۆیەوە دوو پۆلیس و منداڵێک و پیاوێک بریندار بوون.
بەپێی زانیارییەکانی ماڵپەڕی (سپی)، کەمێک پێش ئێستا لە نزیک بازاڕی دهۆک شەڕەتەقە ڕوویداوە و تائێستا چوار کەس برینداربوون.
بەپێی زانیارییە سەرەتاییەکان، بەهۆی ڕووداوەکەوە دوو پۆلیس برینداربوون کە برینی یەکێکیان سەختە و باری تەندروستی ناجێگیرە، هاوکات منداڵێک و پیاوێکیش بریندار بوون، لە ئێستاشدا بۆ وەرگرتنی چارەسەری پزیشکی گەیەندراونەتە نەخۆشخانە.
تائێستا هۆکاری سەرەکی ڕووداوەکە نەزانراوە و لێکۆڵینەوەی هێزە ئەمنییەکانی سنووری پارێزگای دهۆک دەستیپێکردووە.
ئێوارەی رۆژی دووشەممەی ڕابردووش، لە گەڕەکی هەولێری نوێ ڕووداوێکی تەقەکردن لە نێوان دوو وەبەرهێنەر ڕوویدا کە بەهۆیەوە دوو برا و کەسێکی دیکەش گیانیان لەدەستدا و چوار کەسی دیکەش برینداربوون.