بەهۆی لەشەکێشی تورکیاوە ئاگرێکى فراوان لە سنوورى قەزای ئامێدى کەوتەوە

‌
پاش ئەوەی شەوی ڕابردوو لە گوندی سەرگەلێ لە سنوورى قەزاى ئامێدى سەر بە پارێزگاى دهۆک هێزێکی زۆری سوپای تورکیا جێگیرکرا، ئەمڕۆ پێنج شەممە ٤ی تەموزی ٢٠٢٤ بەهۆی لەشکركێشی بەردەوامی ئەو سوپایەوە ئاگرێکى فراوان لە گوندی سەرگەلێ کەوتووەتەوە. 

بەپێی زانیارییەکانی ماڵپەڕی (سپی)، کاتژمێر (١١:٣٠) پێشنیوەڕۆی ئەمڕۆ گەریلاکانی پەکەکە هێرشیانکردە سەر سەربازانی سوپای تورکیا کە شەوی ڕابردوو هێزەکانی دەوڵەتی توکیا هێنراونەتە گوندی سەرگەلێ لە سنووری قەزای ئامێدی، لە ئەنجامدا شەڕ و تەقە دروستبووە و ئاگرێکی فراوان لە گوندی سەرگەلێ کەوتووەتەوە. 

بەپێی زانیارییەکانی (سپی)، لە ئەنجامی ئەو شەڕە نزیکەی (١٠) سەربازی دەوڵەتی تورکیا کوژراون و برینداربوون، شەڕەکەش بۆ ماوەی نزیکەی کاتژمێرێک بەردەوام بووە لە بناری چیای مەتین دەنگی چەکی سوک و مامناوەند و قورس بیستراوە، لە ئێستادا خەڵکی چوار گوندی سنوورەکە گەیشتوونەتە شوێنی ڕووداوەکە تا کۆنترۆڵی ئاگرەکە بکەن، چونکە ئاگرەکە هاتۆتە ناو کۆڵان و ڕەز و باخی گوندی سەرگەلێ، بەڵام سەربازانی سوپای تورکیا تەقەیەکی زۆر دەکەن لە خەڵکەکە تا نەتوانن ئاگرەکە کۆنترۆڵ بکەن. 

هەروەها لە ئێستاشدا فڕۆکە جەنگییەکانی دەوڵەتی تورکیا بە دوری کەمتر لە (٣٠٠) مەتر سەنتەری گوندی سەرگەلێ بۆردومان دەکەن کە ترسێکی زۆری لای هاوڵاتییانی سنوورەکە دروستکردووە و تا ئێستاش سورانەوەی فڕۆکەی بێفڕۆکەوانی توکیا بە ئاسمانی ناوچەکە دەبیسترێت و دەنگی تەقەی سوپای  تورکیاش لەو شوێنە دەبیسترێت. 

هەرچەندە لە ئەنجامی شەڕ و پێکدادانی گەریلاکانی پەکەکە و سوپای تورکیا هیچ زیانێکی گیانی بەر هاوڵاتییانی گوندی سەرگەلێ و دەوروبەری نەکەوتووە، بەڵام لە ئەنجامی بۆردومانی فڕۆکەکانی تورکیا ئاگرێکی دیکەی فراوان لە ناو ڕەز و باخی گوندی سەرگەلێ کەوتۆتەوە، دانیشتوانی سنورەکە ناتوانن کۆنترۆڵی بکەن لەبەر ترسی بۆردومان و تەقەی سەربازانی تورکیا. 

لەم لینکەوە ڤیدیۆی ساتی ڕووداوەکە ببینە


PM:02:52:04/07/2024






ئەستێرەکان

Spee Media