بەهۆی کەوتنەخوارەوەی درۆنێکی تورکیا لە دوو گوندی سنووری قەزای ئامێدی، ئاگرێکی گەورە کەوتەوە و دەیان دۆنم سوتاون.
بەپێ زانیاریەکان، دوانیوەرووی دوێنێ دووشەممە درۆنێکی سوپای تورکیا لە نێوان هەردوو گوندی (کوانێ و مێرستەك) لە قەزای ئامێدی کەوتە خوارەوە.
بەپێی زانیارییەکانی (سپی)، پاش کەوتنە خوارەوەی درۆنەکەی دەوڵەتی تورکیا ئاگر لە هەردوو گوندی (مێرستەك و کوانێ) کەوتەوە تا ئەمڕۆش ئاگرەکە بەردەوامە و بە دەیان دۆنم لە پۆش و پاوان و رەز و باخی هاوڵاتیان و هەزار داری سروشتی سوتاون.
هەربەپێ زانیاریەکان، بەهۆی ترسی بۆردومان و تۆپبارانی سوپای تورکیاوە تا ئێستا ئاگرەکە کۆنترۆڵ نەکراوە.
دوای دانانی چوار خاڵی نوێی سەربازی لە دەڤەری نهێل، شەو و رۆژ چیای مەتین بۆردوماندەکرێت و هاتوچۆی ئۆتۆمبێلە سەربازیەکانی سوپای تورکیا هەموو شەوێك لەسەر جادەی گشتی لە سنوری قەزای ئامێدی دەبینرێت.