لەبارەی ئەو هەواڵانەوە بڵاوکراونەتەوە کە ئاماژە بەوە دەکەن بناری گۆیژە بکرێت بە پرۆژەی نیشتەجێبوون، سەرۆکایەتی شارەوانی سلێمانی رایگەیاند" هیچ پلان و بڕیارێک لەئارادا نیە بۆ ئەنجامدانی (پڕۆژەی نیشتەجێبوون) لە شاخی گۆیژە".
لە روونکردنەوەیەکدا کە شەوی رابردوو ٤ ی ئاب بڵاویانکردۆتەوە، سەرۆکایەتی شارەوانی سلێمانی دەڵێن " چەند ڕۆژێکە لەدوای سوتانی بەشێک لە شاخی گۆیژە، هەندێک پەیج و ڕاگەیاندنی نافەرمی باس لە ئەنجامدانی پڕۆژەی وەبەرهێنانی نیشتەجێبوون ئەکەن لە سەر ئەو شاخە و دامێنی شاخەکە کە دارستانی فەرمیە و ساڵانە خزمەت ئەکرێت".
لە روونکردنەوەکەدا هاتووشە" لێرەوە ئاگاداری هاوڵاتیانی خۆشەویست دەکەین و "ڕایدەگەیەنین کە هیچ پلان و بڕیارێک لەئارادا نیە بۆ ئەنجامدانی (پڕۆژەی نیشتەجێبوون) لە شاخی گۆیژە"، ئەو دەنگۆیانەی کە باسی لێوە دەکرێت هیچ بنەمایەکی ڕاستی و دروستی نیە".
لە گەڵ تێکدان و شێواندنی گۆیژە کە لە مانگی حوزەیرانی ئەمساڵەوە دەستیپێکردووەو، هەفتەی رابردووش کە چەند جارێک لە گۆیژە و ئەزمەڕ ئاگرکەوتەوە، ئەو پرسە بووە رای گشتی و چەندان لە چەندان مانگەدا چەندان راگەیاندن و لێدوان و تار بڵاوکرانەتەوە کوڕو سمینار و چالاکی جەماوەری سازکرراون، کە ئاماژەیان بەوە دەکرد شاخی گۆیژە بە مەبەست سوتێنراوە هەروەک چۆن ئێستا دەشێونێنرێت، تابکرێتە پرۆژەی نیشتەجێبوون وەک ئەوانەی پێشوو، سەرۆکایەتی شارەوانی سلێمانی دوێنێ شەو ئەو روونکردنەوەیەی بڵاوکردەوە.