ئەندامێکی لیژنەی دارایی پەرلەمانی عێراق جەخت لەوەدەکاتەوە کە هەرێمی کوردستان نیوەی داهاتی باج ڕادەستی حکومەتی عێراق دەکات و دەڵێت" لەرۆژى ٣ى ئەیلوول هەرێمی کوردستان لە ٥٠%ـى داهاتى باج دەداتە حکومەتى عێراق".

نەرمین مەعروف، ئەندامى لیژنەى دارایى پەرلەمانی عێراق ڕایگەیاند" کۆبوونەوەى لیژنەی دارایی ئەنجومەنی نوێنەران بە میوانداری سەرۆکی دەستەی گشتی باجەکان و سەرۆکی دەستەی گشتی گومرگ لە حکومەتی عێراق ئەنجامدرا و ئامانج لە کۆبوونەوەکە، کۆکردنەوەی داهاتە نانەوتییەکان بوو لە چوارچێوەی یاسای بودجەی گشتی ئەمساڵ".

وتیشى" سەرۆکی دەستەی باجەکان ئاشکرایکرد بەگوێرەى رێکكەوتنێکی پانزە خاڵی لە هەرێم و عێراق رێکارەکانی سەپاندنی باج لە هەردوو حکومەتی هەرێمى كوردستان و عێراق یەکدەخرێت و لەرۆژى ٣ى ئەیلوول هەرێمی کوردستان لە ٥٠%ـى داهاتى باج دەداتە حکومەتى عێراق".

نەرمین مەعروف ڕاشیگەیاند" هەر بەگوێرەى رێکكەوتنەکە هەردوو حکومەت بەڵگەنامەی ئەستۆپاکی باجی سەر کۆمپانیاکان، کە چالاکییان هەیە لە شارەکانی هەرێمى کوردستان و دەرەوەی هەرێم پەسەند دەکەن و ئەوەش کۆتایی دێنێت بە کێشەی دووفاقى لە وەرگرتنى باجدا و هەر کۆمپانیایەک بەگوێرەى چالاکییەکانى باجى لێ وەردەگیرێت".

پێشتر عەتوان عەتوانی، سەرۆکی لیژنەی دارایی ڕایگەیاندبوو کە" تا ئێستا هەرێمی کوردستان داهاتی ڕادەستی حکومەتی عێراق نەکردووە".