بەرپرسێكی  ئەنجومەنی  وەزیرانی  هەرێمی  كوردستان  ئاشكرای دەكات فەرمانی   دامەزراندنی مامۆستایان بە شێوەی گرێبەست دەرچووە، تەنها واژۆكردنی ماوە.

چێنەر خەفاف بەڕێوەبەری گشتی كارگێری و دارایی سەرۆكایەتی ئەنجومەنی وەزیرانی هەرێمی كوردستان تایبەت بە (باسنیوز)ی راگەیاند، ئەنجومەنی وەزیران رەزامەندی دەربڕیوە لەسەر دامەزراندنی مامۆستایان بە شێوەی گرێبەست، گوتی 'رەزامەندی دراوە لەسەر دامەزراندنەكە، تەنها ماوە فەرمانەكەی بۆ دەربچێت و بكرێتە نووسراو، چونكە قوتابخانەكان پێویستی زۆریان بە مامۆستای تازە هەیە و وەزارەتی پەروەردەش پێداگری زۆری لەسەر ئەم پرسە كردوە، بەڵام نازانم  كەی فەرمانەكە دەردەچێت'.

پێشووتر وەزارەتی پەروەردە داوای  لە حكوومەت  كردبوو بۆ دامەزراندنی 6 هەزار مامۆستا بە شێوەی گرێبەست، بەڵام  بەڕێوەبەری گشتی كارگێری و دارایی سەرۆكایەتی ئەنجومەنی وەزیران، ئاشكرای دەكات دامەزراندنە لەو ژمارەیە كەمترە، گوتی '6 هەزار گرێبەست زۆر زۆرە و دەبێت رەچاوی بارودۆخی ئابوری كوردستان بكرێت، بەڵام  بە دیاریكراوی نازانم  چەند دەبێـت، بەڵام 6 هەزار نییە'.