بە گوێرەی زانیارییەکانی کۆمیسیۆنی باڵای سەربەخۆی هەڵبژاردنەکان ٢٠ دەزگای ڕاگەیاندنی نێودەوڵەتی و ٤٨ دەزگای ڕاگەیاندنی نێوخۆیی بەشداری لە ڕووماڵکردنی هەڵبژاردنەکان دەکەن و ١٣ هەزار و ٤٧٨ چاودێری سیاسی جگە لە دوو هەزار و ١٠٠ چاودێری نێوخۆیی، تۆمارکراوە.
ئەیسەر یاسین، وتەبێژی لیژنەی ناوەندیی هەڵبژاردنی پەرلەمانی کوردستان بە ئاژانسی هەواڵی عێراقی ڕاگەیاند" کۆمیسیۆن بەتەواوی ئامادەیە بۆ بەڕێوەبردنی هەڵبژاردن و ئاماژەی بەوەش کرد، ماوەی دیاریکراو بۆ هەڵمەتی هەڵبژاردن سبەی شەو کۆتایی دێت".
ئەیسەر یاسین وتیشی" پاش کۆتاییهاتنی هەڵمەتەکە کەرەستەی هەڵبژاردن و ئامێرەکانی دەنگدان بەسەر ناوەندەکانی هەر چوار پارێزگای هەرێمی کوردستان دابەش دەکرێن، بەپێی ئەو پلانەی کۆمیسیۆن دایناوە لە ڕۆژانی ١٥ و ١٦ و ١٧ی مانگ جێبەجێ دەکرێت".
بە وتەی وتەبێژی لیژنەی ناوەندیی هەڵبژاردنی پەرلەمانی کوردستان ژمارەی چاودێرانی سیاسی تۆمارکراو گەیشتووەتە ١٣ هەزار و ٤٧٨ چاودێر جگە لە دوو هەزار و ١٠٠ چاودێری نێوخۆیی کە بەمشێوەیەی خوارەوە بەسەر پارێزگا جیاجیاکاندا دابەش بوون:
- هەولێر: ١٣٤٠ چاودێری سیاسی و ٢٥٧ چاودێری نێوخۆیی .
- سلێمانی: ٥ هەزار و ١٣٨ چاودێری سیاسی و ٦٤٤ چاودێری نێوخۆیی.
- دهۆک: ٦ هەزار و ٧٣٥ چاودێری سیاسی و ١٧٢٣ چاودێری نێوخۆیی.
- هەڵەبجە: ٢٦٥ چاودێری سیاسی و هیچ چاودێرێکی نێوخۆیی لە ڕێکخراوەکانەوە تۆمار نەکراوە.
هەروەها ئاماژەی بۆئەوەشداوە کە چاودێرانی نێودەوڵەتی نوێنەرایەتی ١٣ کونسوڵخانە و ١٧ ڕێکخراو دەکەن، هاوکات ٢٠ دەزگای ڕاگەیاندنی نێودەوڵەتی و ٤٨ دەزگای ڕاگەیاندنی نێوخۆیی بەشداری لە ڕووماڵکردنی هەڵبژاردنەکان دەکەن، ئەیسەر یاسین وادەڵێت.