نێچیرڤان بارزانی داوا لە حکومەتی فیدراڵی دەکات کە هێزی پێشمەرگە پڕچەک بکات وەک بەشێک لە سیستمی بەرگری سەربازی وڵات، جەختی لەوە کردەوە کە" پێشمەرگە بەرگری لە عێراق و ناوچەکە و هەموو مرۆڤایەتی دەکات".
نێچیرڤان بارزانی سەرۆکی هەرێمی کوردستان (ماوە بۆدرێژکراوە)، ئەمڕۆ پێنج شەممە لە ڕێورەسمی (٢٩)یەمین خولی پێگەیاندنی سەربازی لە زاخۆ، وتارێکی پێشکەشکرد و ڕایگەیاند" ئهم ديمهنه بۆ ئێمه و ههموو خەڵکی كوردستان جێگەی شانازيیە كە ٧٩٢ ئەفسەری گەنجمان خوێندنی سەربازی، ئەکادیمی و پراکتیکییان تەواو کرد".
ئەوەشی خستەڕوو، ئەوەی جێگەی دڵخۆشییە ئەوەیە کە لەو ٧٩٢ ئەفسەرەی خوێندنی سەربازییان تەواو کردووە ٥٠ ئەفسەری ژنی لە خۆگرتووە کە ١٣ ئەفسەریان لە تەریقەتی ئێزیدی و ژنێکیش لە کۆمەڵگەی کاکەیی بوون.
هەروەها بارزانی هیواشی خواست کە ژمارەی ئافرەتان لە ڕیزەکانی ئەفسەرانی هێزی پێشمەرگە لە خولی داهاتوودا زیاتر بێت.
وتیشی" هێزی پێشمەرگە ئەفسانەی داعشی شکاند و ڕێگەی نەدا ئەو ڕێکخراوە توندڕەوە لە کوردستان نزیک بێتەوە، پێشمەرگەش نمونەی بەرگری و خۆبەختکردنی دانا".
سەرۆکی هەرێمی کوردستان سوپاس و پێزانینی خۆی بۆ هاوپەیمانی نێودەوڵەتی دەربڕی بۆ هاوکاری و پێشکەشکردنی پاڵپشتی و هاوکاری پێشمەرگە و سوپای عێراق لە جەنگی دژ بە داعش و ئەو پاڵپشتییەی بە "ستراتیجی و چارەنووسساز" وەسف کرد.
هەروەها نێچیرڤان بارزانی داوای لە هاوپەیمانی نێودەوڵەتی کرد بەردەوام بن لە هەماهەنگی و هاوکاری لەگەڵ هێزی پێشمەرگە و سوپای عێراق.
هاوکات جەختی لە بەردەوامی هەماهەنگی و هاوکاری نێوان هێزی پێشمەرگە و سوپای عێراق و هێزەکانی کۆکردنەوەی جەماوەری بۆ بەرقەرارکردنی ئاسایش و سەقامگیری لە عێراق بەتایبەتی لە ناوچە جێناکۆکەکان کردەوە.
دەشڵێت" داعش هێشتا مەترسی جددی لەسەر ئاسایش و سەقامگیری عێراق و ناوچەکە دروست دەکات و زۆر گرنگە هاوکاری و هەماهەنگی نێوان پێشمەرگە و سوپا بەردەوام بێت".
نێچیرڤان بارزانی لە درێژەی قسەکانیدا وتی" چاوەڕوانین حکومەتی فیدراڵی بە پڕچەککردن و دابینکردنی ئەو پێداویستیانەی کە پێویستیانە، ئەرکی خۆی بەرامبەر پێشمەرگە جێبەجێ بکات و لەوەش مەترسن، چونکە پێشمەرگە بەرگری لە عێراق و کوردستان و هەموو مرۆڤایەتی دەکات".