وتەبێژی کۆمسیۆنی باڵای سەربەخۆی هەڵبژاردنەکان لە کەرکوک ڕایدەگەیەنێت" ڕێژەی بەشداریکردن لە دەنگدانی تایبەتدا بۆ هەڵبژاردنی پەرلەمانی کوردستان گەیشتە ٥٠%".
عەلی عەباس زیاب وتەبێژی کۆمسیۆنی هەڵبژاردنەکان لە کەرکوک، لە لێدوانێکی ڕۆژنامەوانیدا ڕایگەیاند" تا کاتژمێر ٣:٣٠ی خولەکی دواینیوەڕۆی ئەمڕۆ هەینی رێژەی بەشداریکردنی دەنگدەرانی تایبەت لە سنووری پارێزگای کەرکوک گەیشتە ٥٠%".
ئەوەشی خستەڕوو، نزیکەی ٢٥٠ ئەفسەر و ئەندامی وەزارەتەکانی بەرگری و ناوخۆ و پێشمەرگە دەنگیانداوە، لە دەرەوەی کەرکوکیش ٤٨٨ دەنگدەر بووە.
وتیشی" ئەو ئامێرانەی لە هەڵبژاردنەکاندا بەکارهێنراون کارایی بەرزیان لە کارکردندا نیشانداوە و هیچ کێشەیەکی تەکنیکیمان تۆمار نەکردووە".
ئاماژەی بەوەشکرد، لە کاتژمێر ٦ی ئێوارەدا ناوەندەکانی هەڵبژاردن دادەخرێن و داتاکان لە ڕێگەی ئامێرێکەوە دەنێردرێت بۆ ناوەندی نیشتمانی لە کۆمیسیۆنی هەڵبژاردنەکان کە بەستراوەتەوە بە مانگە دەستکردەکانەوە.
لە کاتژمێر ٧ی بەیانی ئەمڕۆوە دەنگدانی تایبەت بۆ هەڵبژاردنی خولی شەشەمی پەرلەمانی کوردستان دەستیپێکردووە و پرۆسەکەش تا کاتژمێر ٦ی ئێوارەی ئەمڕۆ بەردەوام دەبێت.