دەستەی داکۆیکردن لە سروشت و موڵکی سلێمانی لە راگەیاندنێکدا دەڵێت" لە ماوەی مێژووی ٢٤٠ ساڵەی سلێمانی ھێندەی ئەم ١٥ ساڵەی ڕابردوو شەڕانگێزی و تاوان بەرامبەر ژینگەی سلێمانی نەکراوە، موڵکی گشتی بەهەدەر نەدراوە و سروشتەکەی نەشێوێندراوە".
بە بۆنەی یادی ٢٤٠ ساڵەی دامەزراندنی سلێمانییەوە، دەستەی داکۆیکردن لە سروشت و موڵکی سلێمانی لە بارەی ئەو دەستدرێژی و تاوانانەی بەرامبەر ژینگەی سلێمانی دەکرێت راگەیاندنێکی بە ناونیشانی " ئەبێت لەیادی ٢٤٠ ساڵەی سلێمانی جلی ڕەش بپۆشین نەک جلی ئاڵاو واڵا "، بڵاوکردەوە.
لە بڕگەیەکی ئەو راگەیاندنەدا هاتووە " لە ماوەی ئەم دوو دەیەدا و لەژێرسایەی فەرمانڕوای کوردا شاری سلێمانی شوناسی ڕاستەقینەی خۆی لێسەندراوتەوە، هیچ خەسڵەتێکی شاری تێدا نەماوە، نە سیمای شارە دێرینەکەی و، نە وەک شارێکی مۆدرێن گەشەی کردووە.
چی تر شار موڵکی دانیشتوانەکەی نییە، سروشتەکەشی لێ زەوتکراوە، ئاوی سازگار وهەوای پاکژ و پانتایی و سەوزایی و شاخ و گرد و هاوینەھاوار و سەیرانگاکانی خراوەتە سەر وەبەرھێنەری حزبە فەرمانڕەواکان. کارێز و کانییەکان لە پێناو باڵاخانەکان ھەمووی کۆنکرێت کراون و کوێر کراونەتەوە".
دەقی راگەیاندنەکە..
ئەبێت لەیادی ٢٤٠ ساڵەی سلێمانی جلی ڕەش بپۆشین نەک جلی ئاڵاو واڵا
لەماوەی مێژووی ٢٤٠ ساڵەی سلێمانی ھێندەی ئەم ١٥ ساڵەی ڕابردوو شەڕانگێزی و تاوان بەرامبەر ژینگەی سلێمانی نەکراوە، مولکی گشتی بەهەدەر نەدراوە و سروشتەکەی نەشێوێندراوە.
سەرەڕای ئەو سەردەمە تاریکانەی کوردستان و سلێمانی لە سایەی دیکتاتۆریدا پێیدا تێپەڕیون، بەڵام هیچ دەمێک هێندەی ئێستا سروشت و موڵکی سلێمانی ڕووبەڕووی تێکدان و داگیرکردن نەبووەتەوە. لە سەردەمی فەرمانڕەوا یەک لە دوا یەکەکانی شاردا، سیستمی ئاوەڕۆ و زێرابیان دروستکرد، سەوز کردن هەمیشە سترایژ بووە، لەساڵانی چلەکاندا باخی گشتیان دروستکردووە، لەشەستەکاندا شاخیان پڕ کردبوو لە سنەوبەر، شەقامەکانیان گوڵڕێژ کردبوو، ئەلەکتریکیان فەراهەم کردووە، کارێزەکانیان بوژاندۆتەوە، دەستکاریکردنی موڵکی گشتی هێڵی سوور بووە، شار موڵکی ھەموو دانیشتوانەکانی بوو، سەیرانگاو هاوینەهەوار و سەرچاوە ئاوییەکانی بۆ خەڵكی شار بووە، شاخ و دەشت و دۆڵی وەک پێکھاتەی سروشتییەکەی شوناسی خۆی هەبوو، خانوو لە کەرەسەی سروشتی ئەم ناوچەیە بنیاتنرابوو، کۆمەڵگاکانی شار خۆیان بەخاوەنی شار زانییوە و کاریان بۆ کردووە، خانووەکانی خۆیان کردۆتە جێ خوێندن و کتێبخانە و گەشەسەندنی کلتووریی.
لە ماوەی ئەم دوو دەیەدا ولەژێرسایەی فەرمانڕوای کوردا شاری سلێمانی شوناسی ڕاستەقینەی خۆی لێسەندراوتەوە، هیچ خەسڵەتێکی شاری تێدا نەماوە، نە سیمای شارە دێرینەکەی و نە وەک شارێکی مۆدرێن گەشەی کردووە.
چی تر شار موڵکی دانیشتوانەکەی نییە، سروشتەکەشی لێ زەوتکراوە، ئاوی سازگار وهەوای پاکژ و پانتایی و سەوزایی و شاخ و گرد و هاوینەھاوار و سەیرانگاکانی خراوەتە سەر وەبەرھێنەری حزبە فەرمانڕەواکان. کارێز و کانییەکان لە پێناو باڵاخانەکان ھەمووی کۆنکرێت کراون و کوێر کراونەتەوە. پانتاییە سروشتی و سەوزاییەکانی بە تەلی دڕکاوی و سیاج و چەکدار تەندراون و بەزەبری چەک وترساندنی دانیشتوانەک ی داگیرکراون، لەدوای سەرمەسیتییەک ماستەر پلانەکان لە شەو رۆژێکدا دەگۆڕێت ، شەهوەتی خڕکردنەوەی سەرمایەی دەستەڵاتدار و وەبەرهێنەرەکانیان دادەبارێتە سەر پانتایی شار لەسەر حسابی ژینگەو سروشت و تەندروستی شارنشینەکانی.
خاپوورکردنی سروشتی گۆیژە و (سییەکانی) سلێمانی بەردەوامی هەیە، داگیرکاری موڵکەکانی پەروەردەو فێرکردنی مناڵان بەردەوامە، بڕینی سەرچاوە ئاوییەکانی سەرچنار و پلانی دروستکردنی باڵەخانەکان تێیدا بڕیاری لەسەردراوە، بڕیینەوەی هەزارەها داری بەرداری باخەکانی قەرەتۆغان بۆ دروستکردنی یەکەی نیشتەجێبوون چۆتەبواری جێبەجێ کردنەوە.
گەر بەم شێوەیە شارو ژینگەی سلێمانی داگیربرێت و بشێونێبرێت یادی چی بکرێتەوە؟ داگیرکاری موڵکی گشتی وسروشتەکەی؟ شێواندنی سیماکەی؟ تێکدانی ژینگەکەی؟ بلاوکرنەوەی هەزارەها پەتا بەهۆی شێواندنی ژینگەکەی؟ خزمەتگوزراییەکانی لە ئاوی پاکژ و ووزەی کارەباکەی؟ هەوا پڕ دوکەڵ وگازە ژەهراوییەکانی؟ یاخود بە کۆنکرێتکرندنی شار و پلاستیکڕێژ کردنی؟
لە ئێستادا و لەیادی ٢٤٠ساڵەی دروستبوونی شاری سلێمانیدا، باجی بێدەنگ بوون هێندە قورس کەوتۆتەوە کە هەر دەستدرێژییەک دەکرێتە سەر موڵکی گشتی و پانتایی شارەکە دەستدرێژییە بۆ سەر مافە سەرەتاییەکانی خەڵکی سلێمانی.
جێی خۆیەتی لەم یادەدا دوور لە پیاهەڵدانی درۆ، هەڵوەستەیەکی ڕژد لەسەر دۆخی داگیرکاری، قۆرخکاری و تێکدانی سروشت و موڵکی سلێمانی و شارەکانی تری هەرێم بکەینەوە.
تیشک بخەینە سەر ئەو هۆشیارییە ژینگەیی و مەدەنییەی لای هاوڵاتیانی شارەکە چەکەرەی کردووە و سەدان چالاکی بوارەکەی لە دەوری خۆی کۆکردۆتەوە لە پێناو بەرگریکردن لە سروشت و موڵکی سلێمانی، کە لەم ساڵدا فشارێکی مەدەنیی بێ وێنەیان خستە سەر دامودەزگا حیزبی و حکومییەکانی سلێمانی.
هەوڵەکانمان بەوپەڕی تواناوە درێژە پێ دەدەین تا ئەو کاتەی کە سنوورێک بۆ داگیرکاری و تێکدانی سروشت و موڵکی سلێمانی دادەنرێت.
دەستە داکۆیکردن لە سروشت و موڵکی سلێمانی
١٣ ی تشرینی دووەمی ٢٠٢٤