بە بۆنەی ٢٤٠ ەمین ساڵیادی دامەزرانی سلێمانی ڕۆژنامەنووسێک ڕایدەگەیەنێت"خراپترین یادکردنەوەی شارەکان یادکردنەوەی کەلاوەیە، یادکردنەوەی بێمانایە بۆ گروپێک وەبەرهێنی دەستڕۆشتوو، بۆ وەبەرهێنانێکی بێمانا، وەک یادی ٢٤٠ ساڵەی سلێمانی و شارەکانی تر، کۆمیدیاکە ئەوەیە ٢٤٠ وەبەرهێنەرت هەڵتۆقاندبێ و ٢٤٠ پڕۆژەی دڵگیرو دانسقەو ستراتیژیت نەبێ، بەڵام وەبەرهێنت هەبێ ٢٤٠ کریدت بانکی نهێنی هەبێ لەم وڵات و ئەو وڵات لەسەر حسابی خەڵکی و موڵکی گشتی".

ئاسۆ عەبدولەتیف ڕۆژنامەنووس لە وتارێکدا وێرای ئاماژەدان بە ٢٤٠ ەمین ساڵیادی دامەزراندنی شاری سلێمانی دەڵێت" گەر یادی شارەکان بەرز ڕادەگرن و یادی جوانیەکانی دەکەنەوە، هەرچی زووترە چاکسازیی ڕیشەیی بکەن لە زیادەڕەوی و داگیرکاریی دۆنم و زەوی و سێکتەرە عەقاریەکان و موڵکایەتی گشتی و ئەوەندە وەبەرهێنی ساختەو پاتاڵ، وەبەرهێنی وەکیل، خۆیان نەکەن بەخاوەنی شار، باچیتر سپۆنسەری ڤیستیڤاڵی یادکردنەوەکان نەکەن بۆ خۆبەفریشتەکردن و شاردنەوەی فەزاحەتەکانیان".

لەبەشێکی دیکەی وتارەکەشیدا ئاماژە بۆ ئەوە دەکات" گرنگە ئەگەر یادی شاردەکەنەوە، یاساو حورمەتی دەستە کارگێڕییەکان نەخرێنە خزمەتی کۆکردنەوەی سەروەت و سامان بۆ وەبەرهێنەرو ئەولادەکانیان، زەویە گرانبەهاکان نەکەن بەقوربانی بۆ چەند سیاسیەکی کۆن و بازرگان و وەبەرهێنێک کە هیچ سەنگ و قورساییەکیان نەماوە لەکۆمەڵگادا، یەک پرۆژەی جوانیان پێشکەشی ئەم وڵاتە نەکردوە، بەداخەوە بوونەتە سەفیری تاڵانیی و ملیاردێر بەسەر شانی حکومەت و بەردەوامیشن لەسەر ساختەکاریەکانیان".

ئاسۆ عەبدولەتیف دەشڵێت" لە کوێی یاساکانی وەبەرهێناندا، مافی خەڵک و بەرژەوەندیەکانیان پارێزراوە؟ سادەترین ماف، تاپۆکردنی یەکەکانیانە کەبەپارەی گیرفانی خۆیان کڕیویانەو وەبەرهێن بۆ ئەو بڕە ڕسوماتە عەقاریەی خۆی کەلەکاتی کڕین و فرۆشتندا وەک نوسینگانە دەستی دەکەوێ تاپۆی ناکات بۆیان، سەرباری ئەوە ئاوو کارەبای نیشتیمانیان نیە".

بۆ خوێندنەوەی دەقی وتارەکە کلیک لەسەر لینکی خوارەوە بکەن

https://speemedia.com/drejaWtar.aspx?NusarID=119&Jmare=12454