پۆلیسی هەولێر دەستگیرکردنی ئەو کەسانەی راگەیاند كە شەوی رابردوو لە شەقامی ٦٠ مەتری هەولێردا تەقەیان كردووە.
بەڕێوەبەرایەتی پۆلیسی پارێزگای هەولێر، ئەمڕۆ پێنج شەممە بڵاویکردەوە" دوو تۆمەتبار بەناوەكانی (ز. ح. و) و (ع. س. م) دەستگیرکراون كە شەوی ڕابردوو بەشێوەیەكی هەڕەمەكی لەناو شاری هەولێر لەسەر شەقامی ٦٠ مەتری تەقەیان كردبوو".
پۆلیسی هەولێر دەشڵێت" دوای لێكۆڵینەوە و بەدواداچوونی تیمەكان دەركەوت كە ئەو دوو تۆمەتبارە لەناو ئۆتۆمبلێكی جۆری (تاكسی) بەشێوەیەكی هەڕەمەكی و نابەرپرسیارانە لەسەر شەقامی ٦٠ مەتری تەقەیان كردووە و فیشەكێك بەر پەنجەرەی یەكێك لە تاوەرەكانی نیشتەجێبوون كەوتووە، بۆیە پاش وەرگرتنی ڕەزامەندی دادوەری لێكۆڵینەوە، تۆمەتباران دەستگیرکران و پەڕاوی لێكۆڵینەوەیان بۆ كرایەوە و درانە دادگا".