ناوەندی ڕاگەیاندنی ئەنجومەنی سەربازی مەنبەج کە بەشێکە لە هێزەکانی سوریای دیموکرات بەیاننامەیەکی بڵاوکردەوە و دەڵێت"مەنبج نەکەوتووە و دەیان کوژراو و بریندار لەنێو ڕیزەکانی بەکرێگیراوەکاندا هەیە".
ئەنجوومەنی سەربازیی منبج لە راگەیەندراوێکدا دەڵێت، لە ماوەی ١٢ رۆژی رابردوو و پاش تەشەنەسەندنی رووداوەکانی ئەمدواییەی سووریا، چەکدارانی نزیک لە تورکیا بە پاڵپشتی ئاسمانی تورکیا، دەیان هێرشیان کردووەتە سەر منبج و گوندەوارەکانی و سەرجەم ئەو هێرشانە لە لایەن هێزەکانیانەوە پوچەڵکراونەتەوە.
ئەوەشیان خستووەتەڕوو، لە ماوەی دوو رۆژی رابردوودا ئاستی هێرشەکان بۆ سەر شارەکە، لەسەرجەم میحوەرەکانەوە بەرزتربوونەتەوە و لە ئێستادا پێکدادانە توندەکان لە میحوەرەکانی تۆخار، عەون دادات، عەرەب حەسەن و ئەلعەریمە بەردەوامییان هەیە.
راشیانگەیاند، کە پاشنیوەڕۆی ئەمڕۆ، بە پاڵپشتی هێزی ئاسمانی تورکیا و زرێپۆشەکانیان، چەکداران لە دەروازەی باشووری شارەکە پێشڕەوییان کردووە و لەوێ کەوتوونەتە بۆسەی هێزەکانی سووریای دیموکراتەوە و لە ئێستادا پێکدادانەکان لە دەروازەی شارەکەدا بەردەوامن.
ئەنجوومەنی سەربازیی منبج دەڵێت، متمانەی تەواویان بە توانای شەڕڤانەکانیان هەیە بۆ بەرپەرچدانەوەی هێرشەکان، شانبەشانی خەڵکی منبج و ئامادەی بەرگریکردنن لە شارەکەیان.