لە ئەنجامی بۆردومانێکی دەوڵەتی تورکیا لە باشووری کۆبانێی ڕۆژئاوای کوردستان پەیامنێرێک و ڕۆژنامەنووسێکی (ئاژانسی هەواڵی هاوار) گیانیان لەدەستدا.
کەمێک پێش ئێستا ئاژانسی هەواڵی هاوار بڵاویکردەوە" پەیامنێری ئاژانسەکەمان جیهان بێلکین و ڕۆژنامەنووس نازم دەشتان لەلایەن فڕۆکەکانی سوپای تورکیاوە کرانە ئامانج".
ئاژانسەکە ڕاشیگەیاندووە" پەیامنێری ئاژانسەکەمان، جیهان بێلکین، بە یاوەری نازم دەشتان، بەدواداچوونی بۆ هێرشەکانی تورکیا و گروپەکانی کردووە بۆ سەر بەنداوی تیشرین و پردی قەرقۆزاک".
دەشڵێت" هەڤاڵانمان جیهان بێلکین و نازم دەشتان دوێنێ پێنج شەممە لە کاتی ئەنجامدانی کاری ڕۆژنامەوانییاندا هێرشکراوەتە سەریان".
ئاژانسی هاوار ئەوەشی خستەڕوو، فڕۆکەیەکی بێفڕۆکەوانی دەوڵەتی تورکیا لە کاتژمێر (٣:٢٠) خولەکی پاشنیوەڕۆ ئۆتۆمبێلێکی کردە ئامانج کە تێیدا دەڕۆیشتن لەسەر ڕێگای بەستنەوەی بەنداوی تیشرین و شارۆچکەی سارین، ئەمەش بووە هۆی گیان لەدەستدانیان و برینداربوونی شۆفێری ئۆتۆمبێلەکەیان بەناوی عەزیز حاج بوزان.