سەرۆکی پارتی جەخت لە پێویستی چارەسەرکردنی کێشە هەڵپەسێردراوەکانی نێوان بەغدا و هەرێم دەکاتەوە، دەشڵێت" لە ڕێگەی دیالۆگ و هەماهەنگیەوە كێشە و گرفتەكانی نێوان هەرێم و بەغداد چارەسەر بكرێن".
مەسعود بارزانی سەرۆکی پارتی، ئەمڕۆ سێشەممە لە پەیامێكدا بە بۆنەی هاتنی سەری ساڵەوە ڕایگەیاند" بەبۆنەی سەری ساڵی تازەی زایینییەوە گەرمترین پیرۆزبایی لە هاوڵاتییانی خۆشەویستی كوردستان دەكەم، پیرۆزبایی لە خانەوادەی سەربەرزی شەهیدان و پێشمەرگە قارەمانەكان دەكەم و هیوای خێر و خۆشی بۆ هەموو لایەك دەخوازم".
بارزانی دەشڵێت" بەڕێوەچوونی سەرکەوتووانەی هەڵبژاردنی پەرلەمانی کوردستان لە مانگی تشرینی یەکەمی ئەمساڵدا مایەی دڵخۆشی و شانازییە، بەو پێیەی خەڵکی کوردستان بە ڕوونی پەیام و ئیرادەی خۆیان لەو هەڵبژاردنانەدا دەربڕی، لەسەر ئەو بنەمایە دەنگ و داواکارییەکانی خەڵکی کوردستان دەخرێنەڕوو، پێویستە وەڵامی بدرێتەوە بە پێکهێنانی کابینەی دەیەمی حکومەت لە هەرێمی کوردستان بە زووترین کات، بۆ ئەوەی حکومەت پلان و بەرنامەکانی جێبەجێ بکات کە ئامانج لێی خزمەتکردنی خەڵکی کوردستانە".
سەرۆکی پارتی وتیشی" پێویستی چارەسەرکردنی کێشە هەڵپەسێردراوەکانی نێوان حکومەتی فیدراڵی عێراق و حکومەتی هەرێمی کوردستان لە چوارچێوەی دەستور و ڕێککەوتنەکان و لە رێگەی گفتوگۆ و هەماهەنگی نێوان هەردوولا، و ڕاگرتنی دروستکردنی ئاستەنگ و ئاستەنگ لە بەردەم مافەکانی خەڵکی کوردستان دروست نەکرێن".
بارزانی لە درێژەی قسەکانیدا وتی" لەگەڵ هەنگاونان بەرەو سەرەتای ساڵی نوێ، هەرێمەکەمان بە هەلومەرجێکی هەستیاردا تێدەپەڕێت لەگەڵ ئەو کاریگەرییانەی کە ڕووداوەکان و گۆڕانکارییەکانی سووریا لەسەر هەلومەرج و هاوکێشەکانی ناوچەکە هەیانە، لە هەمان کاتدا نوێنەرایەتییەکی نوێ دەکەن دەرفەتێک بۆ پێکهاتەکانی سوریا کە بناغەی تۆکمە بۆ پێکەوەژیان و ئاشتی دابنێن".
ڕاشیگەیاندووە" هەرێمەکەمان چیتر بەرگەی قەیران و توندوتیژی و تیرۆر و توندڕەوی و ئاژاوەگێڕی زیاتر ناگرێت، بۆیە پێویستە هەمووان پەنا بۆ وەرگرتنی زمانی دیالۆگ و لێکتێگەیشتن و دوورکەوتنەوە لە ئینکاری و کۆنەپەرستی نەتەوەیی و ئایینی ببەن، هەروەها دەبێت هەمووان درکی پێبکەن". کە هیچ لایەنێک سەرکەوتوو نابێت لە سەپاندنی خۆی بەسەر ئەوانی تردا".
بارزانی لە کۆتایی پەیامەکەیدا دەڵێت" هیوادارین ساڵی نوێ مژدە و ئاشتی و پێکەوە ژیان لە ناوچەکەماندا بڵاوبێتەوە".