کەشناسی عیراق رایدەگەیەنێت" شەپۆلێکی بارانبارین ناوچەکانی عیراق و هەرێم دەگرێتەوە و پلەکانی گەرماش دادەبەزن".
ئەمڕۆ پێنج شەممە دەستەی کەشناسی عیراق پێشبینییەکانی کەشوهەوای بۆ ڕۆژانی داهاتوو بڵاوکردەوە و ڕایگەیاند" سبەینێ
بارستە هەوایەکی سارد ڕوو لە عیراق و هەرێم دەکات کە بەگشتی ئاسمان ساماڵ و هەور دەبێت".
ئەوەشی خستەڕوو، لە ئێوارەی سبەینێوە بارانبارین دەستپێدەکات و لە کاتژمێرەکانی رۆژی یەکشەممەدا کاریگەری شەپۆلەکە کۆتایی دێت.
کەشناسی عێراق باسی لەوەشکردووە، بڕی بارانبارین لە ناوچەکانی هەرێمی کوردستان و ناوەڕاستی عێراق زیاتر دەبێت.
ئاماژەی بەوەشکردووە، ڕۆژی شەممە ئاسمان پەڵە هەور و هەوری تەواو دەبێت و لە هەندێک شوێن بارانی بەخوڕ دەبارێت، لە هەرێمی کوردستانیش پلەکانی گەرما دادەبەزن.
لەبارەی کەشوهەوای ڕۆژی یەکشەممە دەستەی کەشناسی عێراق دەڵێت" ئاسمان پەڵە هەور و هەوری تەواو دەبێت و خێرایی باش (٣٠ بۆ ٤٠) کیلۆمەتر دەبێت لە هەر کاتژمێرێکدا، پلەکانی گەرماش نزمدەبنەوە".