مامۆستایانی ناڕازی بۆ رێگرتن لە " بازرگانیکردنی هەردوو بنەماڵە" رۆژی یەک شەمممە لە عەربەت لە رۆژهەڵاتی سلێمانی خۆپیشاندان دەکەن و رێگا لە تەنکەرە نەوتەکان دەگرن بۆ ئێران.
مامۆستایان و فەرمانبەرانی ناڕازی شەوی ٢١ ی شوبات لە راگەیاندنێکدا داوا لە مامۆستایان، فەرمانبەران، مووچەخۆران کەسایەتییەکان، چین و توێژە جیاوازەکان هێزەکانی دەرەوەی دەسەڵات دەکەن رۆژی یەک شەممە کاتژمێر ١٠ لە عەربەت ئامادەبن بۆ خۆپیشاندان.
لە راگەیاندنەکەدا هاتووە " گەر دەتانەوێت خەباتی مەدەنیی؛ ببرێتە قۆناغێکی نوێ و کاریگەرەوە؟ دەتانەوێت بە کرداریی و هەڵوێستی ڕاستەقینەوە؛ دژ بە تاڵانکاریی و برسیکردن و شکۆشکاندن بووەستینەوە؟ دەتانەوێت لە گۆڕەپانەوە ئەجێندا و پیلانەکانی دەسەڵات شکست پێبێنین؛ ئەو کاتانەی دەیانەوێت ملکەچ و سەرکوتمان بکەن؛ ئێمە خۆڕاگرانەتر و پێداگیرانەتر لە بەرامبەریان بووەستینەوە؟ کەواتە بەشداربە لە خۆپیشاندانە بێوێنە و جەماوەرییەکەی ڕۆژی یەکشەممە ٢٣/ ٢/ ٢٠٢٥."
لە راگەیاندنەکەی مامۆستایان و فەرمانبەرانی ناڕازیدا ئاماژە بە شوێنی خۆپیشاندانەکە کراوە کە عەربەتە ـ بەرامبەر چێشتخانەی کۆڵوانەو خاڵی بەیەکگەیشتنی داهاتە بەتاڵانبراوەکانی خەڵکی هەرێمی کوردستان؛ لە لایەن دەسەڵاتدارانەوە. کاتەکەشی کاتژمێر (١٠)ی سەرلەبەیانییە.
مامۆستایان و فەرمانبەرانی ناڕازی ئاماژە بەوە دەکەن کە بەنامەی فەرمیی؛ UN و دادگای باڵای فیدراڵی و ئەنجومەنی نوێنەران و وەزارەتی ناوخۆی عێراقیان؛ لەم خۆپیشاندانە "مەزنە" ئاگادارکردۆتەوەو، پاراستنی گیان و شکۆی خۆپیشاندەران، خستۆتە ئەستۆی دەسەڵاتدارانی زۆنی سلێمانی.