پارتی و یەکێتی ڕایانگەیاند" کۆبوونەوەیەکی ئەرێنییان ئەنجامداوە"، دەشڵین" هەردوو وەفدی دانوستانکار بڕیاریاندا درێژە بەکۆبوونەوەکانی نێوانیان بدەن".
ئەمڕۆ شەممە،٢٢ی شوبات هەردوو شاندی دانوستانکاری، یەکێتیی نیشتمانیی کوردستان و پارتی دیموکراتی کۆردستان لە سلێمانی کۆبوونەوەیەکی ئەرێنییان ئەنجامدا.
بەپێی ڕاگەیەندراوی کۆبوونەوەکە، هەردوولا کۆبوونەوەیەکی ئەرێنییان ئەنجامداوە، دەشڵێن" کۆبوونەوەکە تایبەت بوو بەخستنەڕوو و گفتوگۆکردنـی راپۆرتی لیژنەی هاوبەشی هەردوولا کە بریتی بوو لە تێڕوانینی سیاسی و کارگێڕی و هەنگاوەکانی پەیوەست بە پێکهێنانی کابینەی دەیەمی حکومەتی هەرێمی کوردستان و دامەزراوەکانی تر".
لە ڕاگەیەندراوەکەدا هاتووە، سەرنج و تێبینی وەفدی دانوستاندکاری هەردوولا خرایەڕوو و میکانیزمی گونجاو بۆ چۆنییەتی رێکخستنەوە و رێککەوتن لەسەر کۆی بابەتەکان قسەی لەسەر کرا .
هەر بۆ ئەو مەبەستەش هەر دوو وەفدی دانوستانکار بڕیاریاندا درێژە بەکۆبوونەوەکانی نێوانیان بدەن بۆ زیاتر لێکتێگەیشتن و داڕشتنی بەرنامەیەکی هاوبەشی پەسەندکراو لەپێناو بەرژەوەندی هاوڵاتیانی هەرێم.