بەرەبەیانی ئەمڕۆ چوارشەممە هێزێکی ئەمنی دەوڵەتی تورکیا هەڵیانکوتایە سەر ماڵی ئەکرەم ئیمامئۆغڵو سەرۆکی گەورە شارەوانی ئیستانبوڵ و دەستگیریانکرد.
گۆکهان گونایدن یاردەدەری سەرۆکی فراکسیۆنی جەهەپە، لە ڕاگەیەندراوێکدا بڵاویکردەوە" بەیانی ئەمڕۆ هێزێکی ئەمنی تورکیا چوونەتە سەر ماڵی ئەکرەم ئیمامئۆغلو سەرۆکی شارەوانی ئیستانبوڵ و دەستگیریانکردووە".
هەروەها میدیاکانی تورکیا ئاماژەیان بەوەکردووە، هەر لە چوارچێوەیەدا زیاتر لە ١٠٠ کەسی دیکەش لەلایەن هێزە ئەمنییەکانی تورکیاوە دەستگیرکراون کە لە نێویاندا ڕۆژنامەنوس و بازرگان هەن.
ئێوارەی دوێنێش زانکۆی ئیستانبوڵ "بەتۆمەتی ساختەکاری" هەڵوەشاندنەوەی بڕوانامەی بەکالۆریۆس و ماستەری ئەكرەم ئیمامئۆغڵوی ڕاگەیاند.
ئەکرەم ئیمامئۆغڵو ساڵی ١٩٧١ لە دایکبووە، سیاسەتمەدار و بازرگانێکی دیاری تورکیایە و مانگی ئاداری ساڵی ڕابردوو لەسەر لیستی جەهەپە، لە هەڵبژاردنی شارەوانییەکانی باکوری کوردستان و تورکیا توانی سەرۆکی شارەوانی ئیستانبوڵ بە دەستبهێنێت.