هێزەکانی سوریای دیموکرات ڕایگەیاند"سەرباری بەڕێوەچونی کارچالاکییەکان بۆ ئاهەنگی نەورۆز لە ڕۆژئاوای کوردستان و سوریا، تورکیا و بەکرێگیراوەکانی بەردەوامبون لە هێرشەکانیان".
ناوەندی ڕاگەیاندنی هێزەکانی سوریای دیموکرات - هەسەدە، لە ڕاگەیەنراوێكدا بڵاوی کردەوە"دوێنێ لە میحوەری بەنداوی تشرین، تورکیا بە تۆپی قورس، دەورووبەری بەنداوەکە و لادێكانی باشووری ڕۆژهەڵاتی منبەجیان بۆردومان کردووە".
ئاماژەی بەوەش کردووە" شەڕڤانانیان هەوڵێكی بەکرێگیراوەکانی تورکیایان پووچەڵ کردووەتەوە و توانیوشیانە ئۆتۆمبێلێكیشیان لەناوببەن، دەشڵێت"تورکیا لەکاتەکانی دوانیوەڕۆدا، دەستی بە تۆپبارانکردنی بەنداوی تشرین کردووە".
باسی لەوەش کردووە"لە بەرەی دێرحافەر، کە لە گوندی ئیمامەوە دەست پێدەکات، تورکیا و بەکرێگیراوەکانی بەسێ فڕۆکەی خۆکوژی هێرشیان کردووەتە سەر هێزەکانیان".
ئەوەشی خستووەتەڕوو" لە بەرەی قەرەقۆزاق، شەڕڤانانی هەسەدە، هەوڵێکی بەکرێگیراوەکانیان بۆ سەر میحوەری ڕۆژئاوای پردی قەرەقۆزاق پووچەڵ کردووەتەوە و بە ئۆپەراسیۆنێک وەڵامی هێرشەکەیان دایەوە، کە تێیدا یەکێک لە پێگهكانی بەکرێگیراوەکان لەناوبرا و ڕادەی ئەو زیانانەشی کە توشی بون نەزانراوە".