ئەمڕۆ دووشەممە بەڕێوەبەرایەتی گشتی کەشناسی و بوومەلەرزەی هەرێم ڕەوشی کەشوهەوای بڵاوکردەوە و دەڵێت" ئەمڕۆ بارینی تاوە باران بەردەوام دەبێت و پلەکانی گەرماش بەشێوەیەکی بەرچاو دادەبەزن".
بەپێی زانیارییەکانی کەشناسی هەرێم، ئەمڕۆ بەگشتی ئاسمان لە نێوان هەوری تەواو بۆ نیمچە هەور دەبێت، لەگەل بەردەوامی دابارینی تاوە باران و بروسکە لە ناوچە جیاجیاکانی هەرێم وە زیاتر لە ناوچە ناوچە شاخاوییەکان و سنووری رۆژهەڵات و پارێزگای سلێمانی کاریگەری دەمێنێت، پاشان بۆ کاتەکانی ئێوارە کەش سەقامگیر دەبێتەوە و ئاسمان بۆ نیمچە هەور پەڵە هەور دەگۆڕێت.
ئەوەشی خستەڕوو، پلەکانی گەرما (٦ تا ٨) پلە دادەبەزن بەراورد بە تۆمارکراوەکانی دوێنێ، خێرای باش (١٠ - ٢٠)کم دەبێت، هەندێکات چالاک دەبێت بۆ سەرووی (٣٠)کم، مەودای بینین (٧ - ٩)کم دەبێت، بەڵام لە کات و شوێنی دابارین (٤ بۆ ٦)کم دەبێت.
ئاماژەی بەوەشکردووە، سبەینێ سێشەممە ئاسمان بەگشتی ساماڵ دەبێت لە کاتەکانی دواینیوەڕۆ بۆ هەوری تەواو دەگۆڕێت پاشان بۆکاتەکانی درەنگ دابارین بەشیوەی نمەباران لە سنووری رۆژئاوا و پارێزگای دهۆک دەستپێدەکات، پاشان بۆ کاتەکانی بەیانی رۆژی چوارشەممە کاریگەری درێژدەبێتەوە بۆ ناوچەکانی تر بەشێوەی تاوەباران و بروسکە، هەروەها پلەکانی گەرما (٢ تا ٤) پلە بەرزدەبنەوە بەراورد بە تۆمارکراوەکانی ئەمڕۆ و خێرای باش (١٠ - ٢٠)کم دەبێت، مەودای بینین (٨ - ٩)کم دەبێت.
بەرزترین پلەکانی گەرمای پێشبینیکراو بە پلەی سیلیزی بۆ سبەی بەمشێوەیەیە:
هەولێر: ٢٦
سلێمانی: ٢٣
دهۆک: ٢٣
زاخۆ: ٢٣
هەڵەبجە: ٢٣
کەرکوک: ٢٨
حاجی ئۆمەران: ١٥
سۆران: ٢٢
گەرمیان: ٢٦