سەرۆک وەزیرانی هەرێمی کوردستان ڕایدەگەیەنێت" پڕۆژەی ڕووناکی (کارەبای ٢٤ کاتژمێری) یەکێکە لە دەستکەوتە گرنگەکانی حکومەتی هەرێمی کوردستان و دەشڵێت: خەرجییەكەی بۆ زۆرینەی خەڵک کەمترە لە پارەی مۆلیدە و كارەبای نیشتمانی".
مەسرور بارزانی، سەرۆك وەزیرانی هەرێم ڕایگەیان" پڕۆژەی ڕووناکی داوا و خواستی چەندین ساڵەی هاووڵاتییانی هەرێمی کوردستان بووە".
ڕاشیگەیاندووە" دابینکردنی کارەبای ٢٤ کاتژمێری، پڕۆژەیەکی نیشتمانییە، کە خاوەندارێتی بۆ وەزارەتی کارەبایە و بە هێزی کاری خۆماڵی کەرتی گشتیی جێبەجێ دەکرێت و چەندین قازانج و سوودی گشتیی هەیە لە ڕووی ژینگەیی و تەندروستی".
وتیشی"ئەنجوومەنی وەزیرانی هەرێمی کوردستان بە کۆی دەنگ پڕۆژەی رووناکی (کارەبای ٢٤ کاتژمێری) پەسەند کردووە و خەرجییەکەشی بۆ زۆرینەی خەڵک کەمترە لەو پارەیەی، کە هاووڵاتییان بە موەلیدە و پارەی کارەبای نیشتمانی پێکەوە، دەیدەن".
سەرۆک وەزیران داواشی لە هاووڵاتییان کرد، کە "بە شێوەیەکی بەرپرسیارانە و بە پێی پێویستیی خۆیان کارەبا بە کاربهێنن و بەفیڕۆی نەدەن، بەو پێیەی بڕی بەکارهێنانی کارەبا، لێرە بە دواوە لە ژێر کۆنتڕۆڵی هاووڵاتییان دەبێت و بە پێی بەکارهێنان پارە دەدەن".