بەڕێوەبەرایەتی گشتی ئاو و ئاوەڕۆی هەرێم، لە بڵاوکراوەیەکدا رایگەیاندووە" کاتژمێر ٣ی پاشنیوەڕۆی ئەمڕۆ دوو شەممە جارێكی دیكە بۆری ئاوی ئیفراز سێ شكاو بەو هۆیەوە لەسەدا ٤٠ی دانیشتوانی شاری هەولێر بێ ئاو دەبن".

دوای ئەم راگەیاندنەی ئاوی هەرێم، هەرمان فەرمانگە راگەیاندنێکی تری بڵاوکردەوەو وتی " بەهۆکاری کارکردنی چەند هاووڵاتیەكی نا بەرپرس بۆ ڕاکێشانی هێڵی کارەبا و هەڵکەندن بە حفارە بۆ دانانی بناغەی ستوون (عمود ) بۆ ڕاکێشانی کارەبا بەبێ ئاگادارکردنەوەی بەڕێوەبەرایەتیمان و دیاریکردنی ڕێچکەی خزمەتگوزاری بەڕێوەبەرایەتی ئاوی هەولێر لەکاتی کارکردنیان هێڵی گوێزەرەوەی ئاوی ئیفراز ٣ جۆری GRP لە هەولێریان شکاندووە لەنزیك گوندی دارەبەن".

 

بۆری ئاوی ئیفراز سێ کەوتۆتە باکووری شاری هەولێر و نزیکەی (٤٠%)ی ئاوی شاری هەولێر، گەڕەکەکانی باکوور و رۆژئاوای شارەکە دابین دەکات، لەوانە گەڕەکەکانی زانکۆ، باداوە، فەرمانبەران، ئیسکان و چەند گەڕەکێکی دیکە لەگەڵ شکانی ئەو بۆرییەدا رووبەڕووی کێشەی نەبوونی ئاو دەبنەوە.