شەوی رابردوو خانمە پزیشکیکی سەنتەری نەخۆشییەکان دڵ لە نەخۆشخانەی ئازادیی فێرکاری دهۆک، کۆتایی بە ژیانی خۆی هێناوە و هۆکاری روداوەکەش بە ناڕونی ماوەتەوە.
بە وتەی سەرچاوەیەکی تایبەت لە نەخۆشخانەی فێرکاریی ئازادیی لە شاری دهۆک" شەوی رابردو خانمە پزیشکێک بەناوی (ها، ت ) لە ماڵەکەی خۆیاندا کۆتایی بەژیانی خۆی هێناوە.".
وتیشی" لەکاتی روداوەکەدا ژنە پزیشکەکە لە دەوامدا نەبوە، بەڵکو لە ماڵەوە بوە و بە لێدانی دەرزییەکی تایبەت کە هێشتا رون نەبوەتەوە چییە، کۆتایی بەژیانی خۆی هێنا".
هاوکات مەتین جەمیل، وتەبێژی بەڕێوەبەرایەتی گشتی تەندروستی دهۆک، سەرباری جەختکردنەوەی لە دروستی هەواڵەکە، دەڵێت" روداوەکە رێک کاتژمێر ٨ و نیوی شەو رویداوە، هەروەک هێشتا هۆکاری روداوەکە نازانیین، کۆچکردوەکە پزیشکی نیشتەجێی دێرین بوە لە سەنتەری دڵی نەخۆشخانەی ئازادیی و لەهەمان کاتدا فێرخوازی بۆردی کوردستانی نەخۆشییەکانی کرانەوەی سنگە.
لەئێستادا تەرمی ژنە پزیشکەکە لە پزیشکی دادوەریی دهۆکە و بڕیارە پاش توێکاریی بەخاک بسپێرێت.