ئەمڕۆ شەممە سەرۆک کۆمار و سەرۆک وەزیرانی وەزیرانی عێراق سەبارەت بە دۆزینەوەی چارەسەری ڕیشەیی بۆ پابەندبوونە داراییەکانی نێوان حکومەتی فیدراڵی و حکومەتی هەرێمی کوردستان، بەپێی دەستوور و یاسای بودجە و بڕیارەکەی دادگای فیدراڵی کۆبوونەوە.
نوسینگەی سەرۆك كۆماری عێراق، ئێوارەی ئەمڕۆ لە ڕاگەیەندراوێكدا بڵاویكردەوە" د.لەتیف جەمال ڕەشید، لەگەڵ محەمەد شیاع سودانی سەرۆک وەزیرانی عێراق کۆبوەوە و باس لە دۆخی گشتی لەسەر ئاستی نیشتمانی و پێشهاتی سیاسی و ئابوری و پێشخستنی بەرنامەکانی گەشەپێدانی حکومەت کرا، بە تایبەت لە کەرتەکانی پەرەپێدانی ژێرخانی ئابوری و وزە و پێشکەشکردنی خزمەتگوزارییە گشتیەکان".
لەبارەی كێشەكانی نێوان هەرێم و بەغداشەوە دەڵێت" جەختکرایەوە لەسەر پێویستی دۆزینەوەی چارەسەری ڕیشەیی لە چوارچێوەی دەستور و یاسای تایبەت بە پابەندبونی دارایی نێوان حکومەتی فیدراڵی و حکومەتی هەرێمی کوردستان، بەپشت بەستن بە ئەو خاڵانەی کە دیاریکراون لە رێگەی دەستور و یاسای بودجە و بڕیاری دادگای فیدراڵی".
سەرلەبەیانی ئەمڕۆ لەسەر بانگێشتی پارتی بەشێک لە لایەنە سیاسییەکانی هەرێم کۆبوونەوە کە نوێنەری چەند لایەن و هێزی سیاسی ئامادەبوون، کۆبوونەوەکە بۆ تاوتوێکردنی کاردانەوەی بڕیارەکەی حکومەتی فیدراڵی بوو بۆ ڕاگرتنی بودجە بۆ مووچەی فەرمانبەرانی هەرێم.