دەستەی کەشناسیی عێراق ڕایگەیاند" لە ئەمڕۆوە بەهۆی بەرزبونەوەی خێرایی با لە ناوچەکانی ناوەڕاست و باشوری عێراق، تا ڕۆژی پێنجشەممە بەرزبونەوەی تۆز و خۆڵ بەردەوام دەبێت"، دەشڵێت" ئەگەری هەیە لە کۆتایی ئەم هەفتەیەدا لە هەرێمی کوردستان باران ببارێت."
دەستەی کەشناسی و بومەلەرزەزانیی عێراق لە ڕاگەیەنراوێكدا، پێشبینییەکانی کەشوهەوای عێراق و هەرێمی کوردستانی بڵاو کردەوە و دەڵێت" ئەمڕۆ ئاسمان ساماڵ دەبێت لەگەڵ بونی چەند پەڵە هەورێك لە ئاسمانی ناوچەکانی باشور، هەروەها لە ئەنجامی چالاکی با، تۆز و خۆڵ لە هەوادا بەرزدەبێتەوە و پلەکانی گەرماش نزم دەبێتەوە."
لەبارەی سبەی چوارشممە ئەوەی خستوەتەڕو" لە ناوەڕاست و باشوری عێراق ئاسمان ساماڵ دەبێت و لە هەرێمی کوردستانیش نیمچە هەوردەبێت، لە ئەنجامی چالاکبونی با، تۆز و خۆڵ بەرزدەبێتەوە و پلەکانی گەرماش هاوشێوەی سێ شەممە بە جێگیری دەمێنێتەوە".
دەستەکە پێشبینی کردوە، ڕۆژی پێنجشەممە ئاسمانی ناوەڕاست و باشوری عێراق ساماڵ دەبێت، لە هەرێمی کوردستانیش لە بەسیک لە ناوچەکان نیمچە هەور بۆ هەور دەبێت و ئەگەری هەیە باران ببارێت لە ناوچە شاخاوییە دورەکان هەیە لەگەڵ بونی هەورە بروسکە.