وەزارەتی ڕۆشنبیری هەرێم ڕایدەگەیەنێت" ژمارەیەک ڕاسپاردە سەبارەت بە بەهێزکردنی توانای ژنانی ڕۆژنامەنووس ئاڕاستەی دەزگاکانی ڕاگەیاندن كراوە".
ئەمڕۆ سێشەممە وەزارەتی ڕۆشنبیری و لاوانی هەرێم، لە ڕاگەیەندراوێکدا بڵاویکردەوە" ژمارەیەک ڕاسپاردە سەبارەت بە بەهێزکردنی توانای ژنانی ڕۆژنامەنووس بە مەبەستی بڕەودان بە یەکسانی و هاوبەشیکردنی ژنان لە وێستگەكانی بەڕێوەبردن ئاڕاستەی دەزگاکانی ڕاگەیاندن کراوە".
ئاماژەی بەوەشکردووە، ڕاسپاردەکان لەلایەن سەنتەری پەرەپێدانی دیموکراسی و مافی مرۆڤ بە هاوبەشی ڕێکخراوی جاسەنە بۆ ئازادی بیروڕا و میدیا خراوەتەڕوو و ئاراستەی وەزارەتی ڕۆشنبیری کراون.
دەقی ڕاسپاردە و پێشنیازەکان بەمشێوەیەن:
١-گرنگیدانی دامەزراوە میدیاییەکان بە خۆلی ڕاهێنان و ڕەخساندنی دەرفەت بۆ خۆپێگەیاندنی ژنان لە دامەزراوە میدیاییەکاندا.
٢-دانانی ڕێنمایی تایبەت بە ڕێگریی کردن لە هەراسانکردن و توندوتیژییە سێکسیییەکان لە دامەزراوە میدیاییەکاندا و ئەنجامدانی ڕاهێنان بە سەرجەم کارمەندەکانی دامەزراوەکە، کە لەسەر چۆنیەتی ناسینەوە و مامەڵە کردن لەگەڵ هەراسان و توندوتیژییە سێکسییەکان و ڕێکارەکانی ڕاپۆرتکردنیان.
٣-بەرزکردنەوەی ئاستی هۆشیاری کۆمەڵگە و کارکردنی میدیاکان لەسەر ئەنجامدانی گۆڕانکاریی لە تێروانییە هەڵە و باوەکانی تاک و کۆمەڵگە سەبارەت بە ڕۆڵی ژنان لە ناو کۆمەڵگە و خێزان.
٤-فەرهەمکردنی ژینگەیەکی گونجاو بۆ بەردەوامبوون و مانەوەی ژنان لە ناو دامەزراوە میدیاییەکاندا لە ڕێگەی ڕەخساندنی هەلومەرج و ئاسانکارییەکان بۆ ژنانی ڕاگەیاندنکار بە شێوەیەک لەگەڵ پێدوایستی و سرووشت و پێکهاتە بایلوژیەکەیدا بگونجێت.
٥-فشار خستنە سەر پەرلەمان بۆ چەسپاندنی سیستەمی کۆتا بۆ بەشداری پێکردنی ژنان لە ناوەندەکانی بڕیاردان لە دامەزراوە میدیاییەکاندا.
٦-سەندیکای پارێزەران هاوکار بێت لەهەمبەر بەرگریکردن لە ڕاگەیاندنکارانی ژن، کە لە دامەزراوە میدیاییەکاندا ڕووبەڕووی توندوتیژیی دەبنەوە.
٧-گرنگیدان بەو وانە پراکتیکیانەی، کە لە ئەکادیمیەکانی ڕاگەیاندن دەخوێندرێت، کە پەیوەندیدارن بە هاوسەنگ کردنەوەی پێگەی ژن و پیاو لە ناو دەزگا میدیاییەکاندا.
٨-دامەزراوە میدیاییەکان سیاسەتی پۆلیسی تایبەت بە پرسەکانی ژنان و چۆنییەتی ڕۆماڵکردنیان دابرێژن.
٩-جیاکاری نەکردنی ڕەگەزیی لە کاتی بەخشینی خەڵات بە ڕۆژنامەنووسان.
١٠-لەبەرچاو گرتنی باڵانسی هاوسەنگی لە دامەزراندنی سەندیکا و ڕێکخراو و ئەنجوومەنی باڵای بوارەکانی میدیادا.
١١-دامەزراندنی ڕێکخراوی تایبەتمەند بە داکۆکیکردن لە ژنانی میدیاکار لە لایەن خودی خۆیانەوە.