بەپێی ڕێنماییەکی نوێی وەزارەتی دارایی و ئابووریی کوردستان، لەمەودوا فەرمانبەرانی گرێبەستی هەرێم هاوشێوەی فەرمانبەرانی عێراق خانەنشین دەکرێن.
بەگوێرەی ڕێنمایی ژمارە ٢ی ساڵی ٢٠٢٥ی وەزارەتی دارایی و ئابووری لەمەودوا فەرمانبەرانی گرێبەستیش دەتوانن داوای خانەنشینبوون بکەن، بڕیارەکەش زیاتر لە ٧٥ هەزار فەرمانبەر دەگرێتەوە.
بۆ ئەو مەبەستەش وەزارەتی دارایی کوردستان داوای لە سەرجەم وەزارەت و فەرمانگەکان کردووە دۆسیە ئەو فەرمانبەرانە ئامادە بکەن کە خانەنشینبوون دەیانگرێتەوە، لەمەودوا ١٠% لە مووچەی ئەوانیش بۆ خانەنشینی دەبڕدرێت، قەرزی ساڵانی ڕابردووشیان لێ وەردەگیرێتەوە.
بەپێی رێنماییەکان پێویستە فەرمانبەرەکە ١٥ ساڵ خزمەتی هەبێت و تەمەنی لە ٥٠ ساڵ کەمتر نەبێت بۆ خانەنشینی ئارەزوومەندانە، بۆ نموونە ئەگەر خانەنشینەکە خۆی داوای بکات، واتا هاوشێوەی فەرمانبەرانی هەمیشەیی یەک مەرجە، ئەگەرنا حکومەت خۆی لە ٦٠ ساڵی خانەنشینی دەکات.