دەزگای ئاسایشی هەرێم ڕایدەگەیەنێت" لە ئۆپراسیۆنێكدا سێ تیرۆریستی داعشیان لەناوچەی پەڵكانە لەناوبردوە، دەڵێت یەكێك لەتیرۆریستە كوژراوەكان بەرپرسیارێتی هەبووە".
دەزگای ئاسایشی هەرێم لە ڕاگەیاندراوێكدا بڵاویكردەوە" دوای كۆكردنەوەی زانیاری و بەدواداچونی ورد و زانیاری هەواڵگریی و دوای دەستنیشان كردنی شوێنی حەشارگە و مانەوەی تیرۆریستان، بەڕێوەبەرایەتی گشتی ئۆپراسیۆنەكانی ئاسایش بەهەماهەنگی دەزگای دژەتیرۆری عێراق، ئۆپراسیۆنێكی هاوبەشیان لەناوچەی پەڵكانە و تاوێركەوە ئەنجامدا و لە ڕوبەڕوبونەوەیەكدا سێ تیرۆریستی داعش لەناوبران."
دەزگای ئاسایشی هەرێم ئاماژەی بەوەدا ئەو سێ "تیرۆریستەی" لەناوبران، یەكێكیان بەرپرسی داعش بوە لە سلێمان بەگ و دو "تیرۆریستیەكەی" تر هاوەڵی بوون.
بەگوێرەی ڕاگەیاندراوەكەی دەزگای ئاسایشی هەرێم، لەو چالاكییەكەدا بەڕێوەبەرایەتی گشتی ئۆپراسیۆنەكانی ئاسایش، شوێنی مانەوە و مۆڵگەی "تیرۆریستانیان" خاپور كرد.