نێچیرڤان بارزانی و رافع عیساوی ڕایدەگەیەنن" پێویستە کێشەکانی نێوان هەولێر و بەغداد بە گفتوگۆ و لەسەر بنەمای دەستوور چارەسەر بکرێن".
ئەمڕۆ دووشەممە نێچیرڤان بارزانی پێشوازی لە رافع عیساوی، سیاسەتمەدار و جێگری پێشووتری سەرۆک وەزیرانی عێراق کرد.
بەپێی راگەیێندراوێکی سەرۆکایەتی هەرێم، لە دیدارەکەدا دوایین پێشهاتە سیاسییەکانی عێراق، پەیوەندییەکانی نێوان هەولێر و بەغدا، هەروەها کاریگەرییەکانی دۆخی رۆژهەڵاتی ناوەڕاست لەسەر عێراق گفتوگۆیان لەبارەوە کراوە.
ئاماژە بەوەشکراوە، هەردوولا جەختیان لەسەر گرنگی پاراستنی ئارامی و سەقامگیری عێراق و دوورخستنەوەی لە کێشە و ململانێکانی ناوچەکە کردووەتەوە.
هەروەها هەردوولا هاوڕا بوون لەسەر ئەوەی کە کێشەکانی نێوان هەولێر و بەغداد لە رێگەی گفتوگۆ و لەسەر بنەمای دەستوور چارەسەر بکرێن،" چونکە ئەمە لە بەرژەوەندی تەواوی هاوڵاتییانی عێراقدایە".