وتەبێژێکی باڵیۆزخانەی ئەمریکا لە بەغداد ڕایدەگەیەنێت" دواخستنی بێکۆتایی چارەسەرکردنی کێشەکانی هەولێر و بەغدا قبوڵناکەین و پێویستە بە زوویی دەست بە هەناردەی نەوتی هەرێم بکرێتەوە".
ئەمڕۆ دووشەممە وتەبێژی باڵیۆزخانەی ئەمریکا لە بەغداد، لە لێدوانێکدا بە میدیای پارتی ڕاگەیاندووە" گرنگە کە حکومەتی عێراق و ھەرێمی کوردستان و لایەنە پەیوەندارەکانی دیکە بەزوویی دەست بە وەگەڕخستنەوەی ھێلی بۆری نێوان عێراق و تورکیا بکەن".
دەشڵێت" سێ کۆمپانیای ئەمریکی بەشێوەیەکی راستەوخۆ زەرەرمەند بوون بەھۆی داخستنی بۆرییەکە، ئەمەش قبوڵکراو نییە".
وتەبێژی باڵیۆزخانەی ئەمریکا لە بەغداد ڕاشیگەیاند" بەردەوام هانی ھەموو لایەنەکانمان داوە، تاوەکو کێشەکان چارەسەربکەن و دواخستنی بێکۆتایی ئەم بابەتە قبوڵناکەین".