بەڕێوەبەرایەتی هاتووچۆی هەولێر ڕایدەگەیەنێت، بڕیاریان داوە بە بەجیاکردنەوەی پشکنینی ئۆتۆمبێلی بەکارنەهاتوو(ژمارە کاتی سفر کیلۆمەتر)ی هاوڵاتیان لە کۆمپانیاکان.
بەڕێوەبەرایەتی هاتووچۆی هەولێر لە ڕاگەیەنراوێكدا ئاماژەی بەوەداوە، لەپێناو بەرژەوەندی گشتی و ئاسانکاری بۆ هاووڵاتیان بڕیارماندا بەجیاکردنەوەی پشکنینی ئۆتۆمبێلی بەکارنەهاتوو(ژمارە کاتی سفر کیلۆمەتر)ی هاووڵاتیان لە کۆمپانیاکان بەم جۆرەی خوارەوه:
١- هەرسێ بنکەی پشکنینی (کەسنەزان ، ٣٢ی پارک ، گوێر) بەیانیان پشکنینی ئۆتۆمبێلی هاووڵاتیان جۆری (ژمارەکاتی سفرکیلۆمەتر) لێ ئەنجام دەدرێ.
واتە ئۆتۆمبێلی سفر کیلۆمەتری کۆمپانیاکان نابێ لە کاتی دەوامی بەیانیان سەردانی ئەم بنکانەی پشکنین بکەن . تایبەتە بە ئۆتۆمبێلی هاووڵاتیان.
٢- بنکەی ٣٢ ی پارک لە کاتژمێر (٣ تا ٦)ی دوای نیوەڕۆ تایبەتە بە پشکنینی ئۆتۆمبێلی ژمارە کاتی سفر کیلۆمەتری کۆمپانیاکان و هاووڵاتیان.
واتە هاووڵاتیان لەو کاتەی بۆ پشکنینی ئۆتۆمبێلی کۆمپانیاکان دیاری کراوە ئەوانیش دەتوانن دوای نیوەڕۆ ئۆتۆمبێلەکانیان ببەن بۆ پشکنین لە بنکەی پشکنینی ٣٢ پارک تەنها ئەگەر ژمارەکاتی سفر کیلۆمەتر بێت.
٣- ئۆتۆمبێلی ژمارە کاتی بەکارهاتوو هەر وەک پێشوو لە بنکەی پشکنینی ٣٢ پارک بەیانیان پشکنینی بۆ ئەنجام دەدرێت .
٤- ئۆتۆمبێلی ژمارە هەولێری تۆمارکراو لەهەردوو بنکەی کەسنەزان و گوێر پشکنینی بۆئەنجام دەدرێ.
جەختیشی كردۆتەوە، ئەم بڕیارە بەیانی ڕۆژی دوو شەممە ڕێکەوتی (٢٠٢٥/٩/١٥) دەکەوێتە بواری جێبەجی کردن.