سەرۆکایەتی هەرێمی کوردستان و ئەمریکا جەختدەکەنەوە لەوەی پێویستە بە زووترین کات کێشەی داراییەکانی نێوان بەغدا و هەولێر چارەسەر بکرێت
چوارشەممە، ٢٤ی ئەیلول، سەرۆکی هەرێمی کوردستان، پێشوازیی لە جۆشوا هاریس، هەڵسوڕێنەری باڵیۆزخانەی ئەمریکا لە عێراق و شاندێکی یاوەری کرد.
هەردوولا جەختیان لەسەر پەرەپێدانی پەیوەندییەکان کردەوە، هاریس ئاماژەی بە بەها هاوبەشەکانی ئەمریکا و هەرێمی کوردستان کرد و دووپاتی کردەوە کە واشنتن پابەندە بە بەهێزکردنی ئەو پەیوەندییانە و فراوانکردنی هاوکاریی هاوبەش.
لە بەشێکی دیکەی کۆبوونەوەکەدا باسی پرسی مووچە و شایستە داراییەکانی مووچەخۆرانی هەرێمی کوردستان کراوە "هەردوولا هاوڕا بوون لەسەر ئەوەی کە پێویستە بە زووترین کات دۆسیەی دارایی و مووچە یەکلایی بکرێتەوە و چارەسەرێکی یەکجارەکی بۆ بدۆزرێتەوە".
مەترسییەکانی تیرۆر و بەرەنگاربوونەوەی هەڕەشەکانی داعش، پێشهاتەکانی رۆژهەڵاتی نێوەڕاست و دۆخی ناوچەکە بە گشتی، تەوەرێکی دیکەی کۆبوونەوەکە بوو. لە دیدارەکەدا، کۆنسووڵی گشتیی ئەمریکا لە هەرێمی کوردستان ئامادە بوو.