جێگری سەرۆکی حکومەتی هەرێم، قوباد تاڵەبانی رایگەیاند "کلیلی چارەسەری کێشەکان لە بەغدادە و پێویستە پەیوەندییەکان لەسەر بنەمایەکی تەندروست دابڕێژرێنەوە".

لە دیداری مێری قوباد تاڵەبانی لە وتارێکدا ئاماژەی بەوە کرد کرۆکی سەرەکی کێشەکان لەگەڵ بەغداد جێبەجێ نەکردنی یاسایە" و وتی "پێویستە پەیوەندیمان لەگەڵ بەغداد لەسەر بنەمای دەستوور بێت."

زیاتر روونیکردەوە کە "بەغداد شوێنی بەدەستهێنانی مافەکانی خەڵکی کوردستانە" و "قوڵایی ستراتیجی هەرێمی کوردستان لە بەغدادە." بۆ گەیشتن بەم ئامانجە، داوای کرد کە "پێویستە پەیوەندییەکی دامەزراوەیی و دوور لە میزاجمان لەگەڵ بەغداد هەبێت" و "پێویستە دەستووری عێراق وەک خۆی جێبەجێ بکرێت."

لە بارەی پرسی نەوتەوە، قوباد تاڵەبانی، رەخنەی لە نەبوونی یاسایەک بۆ کەرتێکی گرنگی وەک نەوت، وتی: "کارەساتە وڵاتێکی نەوتی یاسای نەوت و گازی نەبێت." هەروەها ئاماژەی بەوەشدا کە "عێراق یەک سەرچاوەی داهاتی هەیە و یاسایەکی نییە بۆ رێکخستنی."

ئەو جەختیکردەوە "پێویستمان بە یاسای نەوت و گازە بۆ یەکلایکردنەوەی یەکجاری کێشەی نەوت و گاز، چونکە ئەم یاسایە دەتوانێت ببێتە دەستوورێکی ئابووری بۆ عێراق."

لە بارەی مووچەوە تاڵەبانی، رایگەیاند: "گرفتی مووچە و کێشەی دارایی لەگەڵ بەغداد هاووڵاتییانی ماندووکردووە." ئەو بە راشکاوی وتی کە "وڵات بە هات و نەهاتی مووچە ناچێت بەڕێوە" و پێویستە چیتر هاووڵاتی لەم دۆخەدا نەبێت، بۆیە "دەبێت دڵەڕاوکێی هاتنی مووچە کۆتایی بێت."