دەستەی ڕاگەیاندن و گەیاندنی عێراق ڕایگەیاندوە، کە ڕۆژی شەممە ٨ تشرینی دووەم، بانگەشەی هەڵبژاردن بۆ ئەنجومەنی نوێنەرانی عێراق ڕادەوەستێت و بڕیاری قەدەغەی بانگەشەی میدیایی بۆ هەڵبژاردن دەچێتە بواری جێبەجێکردنەوە.
پێنج شەممە، ٦ تشرینی دووەم ٢٠٢٥، نوسراوێک لە لایەن دەستەی ڕاگەیاندن و گەیاندنی عێراقەوە بڵاوکراوەتەوە و سەبارەت بە قەدەغەی بانگەشەی میدیایی لە کاتژمێر حەوتی بەیانی ڕۆژی شەممەوە(٨ تشرینی دووەم ٢٠٢٥)، تا داخستنی بنکەکانی دەنگدان، بەردەوام دەبێت، لە نوسراوەکەدا هاتوە کە ئامانج لەم بڕیارە مسۆگەرکردنی هەڵبژاردنێکی پاک و بێ لایەنانەیە، کە دووربێت لە کاریگەریی بانگەشەی کۆتایی لە لایەن بەربژێرەکان و لیستەکانەوە.
دەستەکە داواش لە هەموو دەزگاکانی ڕاگەیاندن دەکات ببنە هاوبەشێکی نیشتمانی لە سەرخستنی پڕۆسەی هەڵبژاردن، بە پابەندبوون بە رێوشوێنەکانەوە و دروستکردنی ژینگەیەکی ئارام بۆ دەنگدەران، تاوەکو بتوانن بە دوور لە بانگەشە بڕیارەکانیان بدەن.
بانگەشەی هەڵبژاردن لە ٣ تشرینی یەکەمی ٢٠٢٥، لە تەواوی عێراقدا دەستی پێکردوە و ٢٤ کاتژمێر بەر لە دەنگدانی تایبەت، کە لە ٩ تشرینی یەکەمی ٢٠٢٥ ئەنجام دەدرێت، ڕادەگیرێت. ڕۆژی ١١ تشرینی دووەم هەڵبژاردنی گشتی بەڕێوە دەچێت.