هاوسەرۆکی پارتی یەكسانی و دیموكراسی جەختی لەوە کردەوە کە دیداری لیژنەكەی پەرلەمان لەگەڵ ئۆجەلان زۆر بەبایەخ بووە و وتیشی" دیدگای ئۆجەلان کلیلی پرۆسەی ئاشتی دەبێت بەتایبەت لە باکوری رۆژهەڵاتی سوریا".
تولای هاتیموگولاری، هاوسەرۆکی پارتی یەكسانی و دیموكراسی لە میانی کۆبونەوەی گروپی پەرلەمانی پارتەکەیدا، هەڵسەنگاندنی بۆ ئەو دیدارە كرد کە لەلایەن لیژنەی هاوپشتی و برایەتی و دیموکراسی نیشتمانی لەگەڵ عەبدوڵا ئۆجەلان لە ئیمرالی بەڕێوەچوو و وتی" لیژنەی هاوپشتی نیشتمانی و برایەتی و دیموکراسی دیدارێکی زۆر بەبایەخیان لەگەڵ بەڕێز ئۆجەلان لە ئیمرالی ئەنجامداوە".
بە وتەی تولای هاتیموگولاری، نوێنەرەکەیان کە گوڵستان کلیچ کۆچیگیت، بەشێک بوو لەم شاندە، دیدارێكی بونیادنەر و هەمەلایەنە و هیوابەخش بووە، تیشکی خستووەتە سەر پرۆسەی ئاشتی و دیموکراسی لە تورکیا.
وتیشی" ئەم دیدارە هەنگاوێکی مێژوویی بوو، دەرگای ئاشتی و برایەتی کردەوە کە لەمێژبوو چاوەڕوان دەکرا لە تورکیادا، ناكرێت ئەم کۆبونەوەیە تەنها بەدانیشتنێکی گوێگرتن و پەیوەندیکردن بزانرێت، بەڵکو پردێکە بۆ گفتوگۆ کە رەنگە روخساری ئایندەی هاوبەشی گەلان بنەخشێنێت، بێ گومان سەرۆکی پەرلەمان و لیژنەکە زانیاری پێویست سەبارەت بە ناوەڕۆکی کۆبونەوەکە هاوبەش دەکەن".
"گومانمان نییە لەوەی ئۆجەلان جارێکی دیکە بە روونی پابەندبونی خۆی بە پتەوکردنی هاوپەیمانی تورکیاو کوردو زەمینەی هاوبەش بۆ هەموو گەلان و بەردەوامکردنی هەلومەرجی بێ ململانێ و هەوڵدان بۆ چارەسەری دیموکراسی نیشانداوە، بەڕێز ئۆجەلان، دیدگایەکی پێشکەش کردووە کە کلیلی پرۆسەی ئاشتی دەبێت، بەتایبەتی لە باکوری رۆژهەڵاتی سوریا، سەرکەوتنی ئەم پرۆسەیە بۆ ئایندەی تورکیا بنەڕەتییە."( تولای هاتیموگولاری،وای وت).