بە پێی دواین زانیاری تا ئێستا ژمارەی کوژراوەکان بوەتە سێ کەس و دە کەسی دیکەش بریندارن کە برینی شەشیان سەختە.

شەممە، ٢٩ تشرینی دووەم، خەڵکیگوندی لاجانی سەر بە شارەدێی گوێڕ لە سنوری پارێزگای هەولێر دەستیان بە ناڕەزایەتی دەربڕین کرد و لەبەردەم پاڵاوگەی لاناز خۆپیشاندانیان کرد، خۆپیشاندانەکە گرژی تێدا دروستبوو، بە پێی زانیاریە سەرەتاییەکان ژمارەی کوژراوەکان بونەتە سێ کەس و ژمارەی بریندارەکانیش دە کەسە، کە لەلایەن پاسەوانانی پاڵاوگەکە و هێزە ئەمنیەکانەوە تەقەیان لێکراوە.

لە کاتژمێر ٤:٣٠ خولەکی ئێوارەوە تەقەکردن وەستاوە، موختاری گوندەکە و لایەنی بەرپرس لە گفتوگۆدان بۆ ئازادکردنی ئەو کەسانەی دەستبەسەرکراون و جێبەجێکردنی داواکاریەکانیان.

هەتا ئێستا لایەنی بەرپرس لە سنوری پارێزگای هەولێر هیچ ڕونکردنەوەیەکیان نەکردوە و لەلایەن میدیاکانی نزیک لە پارتی دیموکراتی کوردستانیشەوە ڕوماڵی ڕوداوەکە ناکرێت، لە کاتێکدا هەوڵی ڕیگریکردن لە ڕوماڵی میدیاکانی دیکەش درا.

لە کاتێکدا باس لەوە دەکرێت کە کارەبای گوندەکە بڕدراوە و هێزی زیاتریش ڕاوانەی گوندەکە کراوە.

خەڵکی گوندی لاجان لە ٢٧ ئەم مانگەوە دەستیان کردوە بە ناڕەزایەتی دەربڕین دژی داخستنی ئەو دوو پاڵاوگەی بەشێوەی یاسایی لە سنوری گوندەکەیان کاردەکەن و چەند پاڵاوگەیەکی دیکەی نایاسای، خەڵکی ئەو گوندە داواکاربوون ئەگەر پاڵاوگەکانیش دانەخرێن ئەوا خەڵکی گوندەکە لە ناو کارگەکاندا کاربکەن.