ئەندامی ئەنجوومەنی هاوسەرۆکایەتی پارتی یەکێتی دیموکرات (پەیەدە)، جەخت لەوەدەکاتەوە کە ئەحمەد شەرع و ئەسعەد شەیبانی لە دەرەوە ئاراستە دەکرێن و نایانەوێت کێشەی کورد لە سوریا چارەسەر بکرێت و دەڵێت "حکومەتی نوێی سووریا بە تەواوەتی لە ژێر کاریگەریی ئەنقەرەدایە".
رۆژی سێشەممە ٢ی کانونی یەکەمی ٢٠٢٥ ساڵح موسلیم، ئەندامی ئەنجوومەنی هاوسەرۆکایەتی پارتی یەکێتی دیموکرات (پەیەدە)، لە چاوپێکەوتنێکیدا لەگەڵ ئاژانسی هەواڵی (میزۆپۆتامیا) رایگەیاندووە" پێشئەوەی بچێتە واشنتۆن، ئەحمەد شەرع لەگەڵ شاندی دانوستانی ئیدارەی خۆبەڕێوەبەریی کۆبوەوە و لیژنە بۆ جێبەجێکردنی رێککەوتننامەی ١٠ی ئادار درووستکرا، بۆ ئەوەی نیشانی بدات نەرمی نیشانداوە بۆ چارەسەرکردنی کێشەکانی لەگەڵ هەسەدە و ئیدارەی خۆبەڕێوەبەری، ئەمەریکاش دەیەوێت کێشەکان چارەسەر بکرێن، باسی رێککەوتنی سوۆریا و ئیسرائیل هاتە ئاراوە، بەڵام دواتر هیچ هەنگاوێکی کردەیی نەنران."
ساڵح موسلیم، رەخنە لە بەرپرسانی تورکیا دەگرێت بەوەی بەردەوام جەخت لەسەر جێبەجێکردنی رێککەوتنی ١٠ی ئادار دەکەنەوە، بەڵام لە پشت پەردەوە سیاسەتی دژی باکۆور و رۆژهەڵاتی سۆوریا پەیڕەو دەکەن.
" دیمەشق بە تەواوەتی لەژێر کاریگەری تورکیادایە، هەرچی تورکیا بیەوێت دەیکات، گروپەکانی سەر بە تورکیا هەندێکجار هێرش دەکەنە سەر سنوورەکانی ئیدارەی خۆبەڕێوەبەری، ئەوان دەیانەوێت شەڕ لە دێرەزوور و شێخ مەقسود و ئەشرەفیە بکەن. ئەو گروپانە تا ئەمڕۆش پشتیوانی لە تورکیا وەردەگرن و هەوڵی درووستکردنی ئاستەنگ دەدەن."( ، ئەندامی ئەنجوومەنی هاوسەرۆکایەتی (پەیەدە) وای وت).
ساڵح موسلیم ئەوەی خستووەتەڕو، هەندێک گروپ هەن لەناو تورکیا کێشەکانی سووریا بۆ بەرژەوەندی خۆیان بەکاردەهێنن و دەیانەوێت پشێوی دروست بکەن و پرۆسەکە پەکبخەن، کەسانێک هەن لەناو تورکیادا نایانەوێت دانوستانەکان بەردەوام بێت، ئەوەندەی دەبینین لە ئێستادا پرۆسەکە لەلایەن تاکەکانەوە بەڕێوەدەبرێت، یەکێکیان شەرعە و ئەوی دیکەیان شەیبانییە. ئەوان پەیوەندی دەرەکییان هەیە و نایانەوێت کێشەکان چارەسەر بکەن.
ئاماژەی بەوەکردووە، ئیدارەی خۆبەڕێوەبەریی دەیەوێت سنورەکانی لەگەڵ تورکیادا بکرێنەوە و هاووڵاتیان بە ئازادی هاتووچۆ بکەن، بەڵام تائێستا حکومەتی سووریا داواکارییەکی لەو شێوەیەی نەکردووە.
سەبارەت بە هێرشەکانی ئەم دواییەی حکومەتی دیمەشق دژی عەلەوییەکان و دروزەکان، موسلیم دەڵێت: رێککەوتنی ١٠ی ئادار بۆ هەموو سوریا بوو، ماددەی ١ و ٢ بۆ هەموو نەتەوەکانی سووریا بوو. ئەو رێککەوتنە لە کاتی کۆمەڵکوژی عەلەوییەکان ئەنجامدرا، بۆ راگرتنی کۆمەڵکوژییەکان کراوە. پێدەچێت ئێستا بۆچوونی حکومەتی کاتی سووریا لەگەڵ ئەمەدا نەگونجێت، چونکە یەک هێزی حوکمڕانی دەوێت. بۆیە دووژمنایەتی درووز و عەلەوی و کورد دەکات. ئەوانیش بەرگری لە خۆیان دەکەن.
سەبارەت بە هاوکاری نێوان حکومەتی دیمەشق و داعش ساڵح موسلیم دەشڵێت" کاتێک داعش شەڕی ئێمەی دەکرد، ئەوان چوونە ئیدلب و ناو و جلوبەرگیان گۆڕی، ئەوەی ڕوویدا شانۆیەکی نهێنی بوو، کاتێک حکومەتی تەحریر شام هاتە سەر دەسەڵات و رژێمی سوریا رووخا، ئەوان لە ئیدلەب مابوونەوە. شانە نووستوەکان بەئاگاهاتنەوە گروپێکی زۆریان چەکیان هەڵگرت. بۆیە ناتوانین بڵێین حکومەت شەڕی داعش دەکات. ئەوان لە ڕووی ئایدیۆلۆژییەوە یەکگرتوون، هێزە نێودەوڵەتییەکانیش لێکۆڵینەوە و بەدواداچوون لەسەر ئەو پرسە دەکەن".
ساڵح موسلیم راشیگەیاند" ئۆجەلان جارێکی دیکە سەلماندی نابێت خەڵکی رۆژئاوا تەسلیمی جیهادییەکان بن، بەپێویستی دەزانێت سیستمێکی دیموکراسی لە سووریا هەبێت بۆ ئەوەی یەکگرتن رووبدات، بەبێ سیستمێکی دیموکراسی یەکگرتن لە سووریادا بەدینایەت."