بافڵ جەلال تاڵەبانی، سەرۆکی یەکێتیی نیشتمانیی کوردستان لە بەغدا لەگەڵ رەیان کلدانی، ئەمینداری گشتیی بزووتنەوەی بابلیون کۆبوونەوە.
بەپێی ڕاگەیەندراوی نووسینگەی بافڵ تاڵەبانی لە دیدارێکدا گفتوگۆ لەبارەی پێکهێنانی حکومەتی نوێی عیراق و رەخساندنی زەمینەی لەبار لەبەردەم لایەنە سیاسییەکان بۆ گەیشتن بە حکومەتێکی نیشتمانیی خزمەتگوزار کرا.
بافڵ تاڵەبانی، پەرۆشانە جەختی لە سیاسەت و ستراتیجی یەکێتی کردەوە، بۆ گەیشتن بە حکومەتێکی بەهێز و کاریگەر کە خزمەتی خەڵک بکات بەبێ جیاوازی و ببێتە مایەی سەقامگیریی زیاتر.
ئەمە لە کاتێکدایە، لە ئاستی هەرێمی کوردستان ماوەی ساڵێک زیاترە هەڵبژاردنی پەرلەمان ئەنجامدراوە و هێشتا یەکێتی لەگەڵ پارتی ڕێکنەکەوتوە بۆ پێکهێنانی حکومەت.
هاوکات، لە ڕۆژی ١١ی ١١ی ٢٠٢٥، هەڵبژاردنی پەرلەمانی عێراق بەڕێوەچوو و هێشتا حکومەتی عێراقیش پێکنەهاتووە.