ڕێبوار تەها پارێزگاری كەركوك و كاندیدی سەركەوتووی یەكێتی بۆ پەرلەمانی عێراق، ناچێتە پەرلەمان و لە جێگەی ئەو هەڵۆ جەباری، دەچێتە بەغدا و سوێندی یاسایی دەخوات.

بەپێی نوسراوێكی فەرمی ئەمینداری گشتنی پەرلەمانی عێراق كە ڕۆژی ٢٤ی ئەم مانگە ئاراستەی كۆمسیۆنی هەڵبژاردنەكانی كردوە و تێدا هاتووە، ڕێبوار تەها كاندیدی سەركەوتوو دەكشێتەوە و بەشداری سوێندخواردن ناكات وەك پەرلەمانتار و داوا لە كۆمسیۆن دەكات كە كاندیدی جێگرەوە دیاری بكات.

لەوەڵامدا كۆمسیۆنی باڵای هەڵبژاردنەكان لە نوسراوێكدا كە ئەمڕۆ یەكشەممە دەرچووە و تێدا ئەمینداری پەرلەمان ئاگادار دەكاتەوە كە هەڵۆ قادر ئەحمەد كاندیدی ژمارە ١١ی یەكێتی لە پارێزگای كەركوك زۆرترین دەنگی جێگرەوەكانی ئەو حزبەی بەدەستهێناوە و جێگەی ڕێبوار تەها دەگرێتەوە.

ڕۆژی ١١ی ١١ی ئەمساڵ، هەڵبژاردنی پەرلەمانی عێراق بەڕێوەچوو سبەی دووشەممە ٢٩ی کانونی یەکەم، پەرلەمان یەکەم دانیشتینی خۆی ئەنجام دەدات.