ئەندامێکی کۆنسەی بەڕێوەبردنی کۆما جڤاکێن کوردستان "کەجەکە" دەڵێت " ئەگەر پڕۆسەی ئاشتی نەخرێتە چوارچێوەیەکی یاساییەوە، نە ئاشتی بەدیدێت و نە چارەسەری سیاسیی و یاسایی دێتە ئارا".

مستەفا قەرەسوو ئەندامی بەڕێوەبەری کۆما چڤاکێن کوردستان لە چاوپێکەوتنێکی لەگەڵ میدیای حزبەکەی دەڵێت " تاوەکو ئەو کاتەی پرس و کێشەی کورد لە باکووری کوردستان و تورکیا چارەسەر نەکرێت، بیانوو بە هەندێک لایەن دەدات، زیاتر خۆیان وەک دوژمنی کورد دەردبخەن و بەدوای زەمینەی کودەتادا بگەڕێن".

ئەو پێوایە، ئەوانەی لەگەڵ بەردەوامیی شەڕ و پێکدادانی کورد و دەوڵەتی تورکیادان " ئەوانەن کە دەستیان لەگەڵ هێزە دەرەکییەکاندا تێکەڵە".

مستەفا قەرەسوو ئەویش هەمان شێوەی سەرۆکی زیندانیکراوی پەکەکە دەڵێت " کێشەی کورد چارەسەر نەکرێت، مەیلی کودەتا وەک خۆی بەردەوام دەبێت، ئاماژە بەوەشدەکات، بەبێ هەنگاوی یاسایی، ئاشتی بەدینایەت".

لە بارەی دیدی ئاک پارتی و مەهەپە لەمەڕ پرۆسەی ئاشتی قرەسوو دەڵێت " جیاوازیی ئایدۆلۆژی و سیاسیی لەنێوان ئاکپارتی و مەهەپەدا هەیە، بەڵام لەسەر پڕۆسەی ئاشتی هاودەنگن، ئەوەش وای کردووە لەسەر پڕۆسەکە ناکۆکیی نەکەوێتە نێوانیان".

تورکیا و بەتایبەتی کورد چاوەڕوانە لە ساڵی ٢٠٢٦ دا پرسی ئاشتی کە تورکیا ناویناوە" نەهێشتنی تیرۆر " بخرێتە بواری یاساییەوەو کۆتایی بە کێشەی نزیکی ٥٠ ساڵ لە شەڕ و جەنگ بهێنرێت.