گەنجێکی خەڵکی قەزای سەیدسادق هەفتەیەک بەر لە ئێستا بەڕێ کەوتوە بڕوات بۆ ئەوروپا، بەڵام لە نزیک گوندێك لە باکوری کوردستان ڕەق دەبێتەوە و تا ئێستا تەرمەکەی نەدۆزراوەتەوە.
هەڵۆ یونس کەریم، گەنچێکی قەزای سەیدسادقە و ٢٦ کانوونی یەکەم ٢٠٢٥، لە ماڵەوە چووەتە دەرەوە و ویستویەتی بە ڕێگای قاچاخ بڕوات بۆ ئەوروپا، بەڵام بە هۆی سەرماوە لە نزیک گوندێکی شاری شرناخ ڕەق بوەتەوە و تا ئێستا نەتواندراوە تەرمەکەی بدۆزرێتەوە.
لە بارەی ڕوداوەکەوە ڕابەر لوقمان ، ئامۆزای هەڵۆ، بە میدیاکانی ڕاگەیاند "ئامۆزاکەم لەگەڵ هەشت کەسی تر ویستویانە بڕۆنە ئەوروپا، بەڵام بەهۆی بەفر و سەرمای زۆرەوە، لە دەورووبەریی گوندێکی سنووری شرناخ تەندروستیی تێکچووە و قاچەکانی سڕ بووە، ئەو هەشت کەسەشی لەگەڵی بوون، ماوەی کاتژمێر و نیوێک لەگەڵی ماونەتەوە و هاوکارییان کردووە، بەڵام کە کۆچی دوایی کردووە، ڕۆیشتوون و بەجێیان هێشتووە".
هەر بە ووتەی ئامۆزاکەی، ئەوان ڕۆژی پێنج شەممە، ٣١ کانوونی یەکەم ٢٠٢٥، لە ڕێگای قاچاخچیەوە بە ڕووداوەکەیان زانیوە و بە هۆی ئەوەی تەرمی هەڵۆ کەوتوەتە ژێر بەفرەوە تا ئێستا نە دۆزراوەتەوە.