وتەبێژی سکرتێری گشتی نەتەوە یەکگرتوەکان، ئاشکرایکرد کە سکرتێری گشتی نەتەوە یەکگرتوەکان نیگەرانە لە دۆخی سوریا و لەگەڵ حکومەتی سوریا لە پەیوەندیدایە.
ستیڤان دوژاریک، وتەبێژی سکرتێری گشتی نەتەوە یەکگرتوەکان، لە کۆنفرانسێکی ڕۆژنامەوانیدا، چوارشەمە، ٧ کانوونی دووەم ٢٠٢٦، بە کەناڵی ڕوداوی ڕاگەیاند "سکرتێری گشتی نیگەرانە لەو ڕاپۆرتانەی باس لە کوژران و برینداربوونی خەڵکی مەدەنی دەکەن بەهۆی پێکدادانەکان لە حەلەب، نەتەوە یەکگرتووەکان دووپاتی دەکاتەوە کە پاراستنی مەدەنییەکان و ژێرخانە مەدەنییەکان ئەرکی هەموو لایەنەکانە بەپێی یاسا نێودەوڵەتییەکان".
هەروەها وتەبێژەکە ووتی "داوا لە لایەنە شەڕکەرەکان دەکەین دەستبەجێ گرژییەکان کەم بکەنەوە و زۆرترین ئاستی دانبەخۆداگرتن بنوێنن".
ستیڤان دووژاریک، جەختیکردەوە کە ڕێگایەکی گفتوگۆ لە نێوان حکومەتی سوریا و هەسەدە بۆ کۆتایهێنان ڕێگەیەک بۆ دانوستان لە نێوان هێزەکانی سووریای دیموکرات و حکومەتی سوریا بدۆزرێتەوە بۆ کۆتاییهێنان بە ئاڵۆزییەکان.
بە پێی دواین ئاماری ئاسایشی ناوخۆی حەلەب کە ئێوارەی ڕابردوو بڵاویکردەوە " ژمارەی شەهیدانی سڤیل بۆ ٧ کەس و ژمارەی بریندارانیش بۆ ٥٤ کەس بەرزبووەوە، کە زۆربەیان ژن و منداڵن".
ماوەی سێ ڕۆژە گرژی و ئاڵۆزییەکان لە هەردوو گەڕەکی ئەشرەفیە و شێخ مەقسود دەستی پێکردۆتەوە، لە ماوەی یەک ڕۆژدا دۆخەکە ئاڵۆزتر بووە و شەڕ پەرەی سەندوە، بە پێی زانیارییەکان لەو دوو گەڕەکەدا کە ڕێژەی دانیشتوانەکەی ٢٠٠ هەزار کەسە لە ٨٠٪ ـیان کوردن و بەشێکی زۆریان ئاوارەی عەفرینن.