دیلان یەشیلگۆز، سیاسەتمەداری کورد، وەک وەزیری بەرگری
و جێگری سەرۆکوەزیرانی هۆڵەندا دەستبەکاربوو.
هەرسێ پارتی (D66)، (CDA) و (VVD) گەیشتنە ڕێککەوتنی کۆتایی بۆ پێکهێنانی حکومەتێکی کەمینە. لەم
دابەشکارییەدا، دیلان یەشیلگۆز وەک سەرۆکی پارتی (VVD) نەک تەنها
پۆستی وەزیری بەرگری و جێگری سەرۆکوەزیرانی وەرگرت، بەڵکو حزبەکەشی بەرپرسیارێتی 6
وەزارەتی گرنگی لە کابینە نوێیەکەدا بەرکەوت.
دابەشبوونی وەزارەتەکانی پارتی VVD بە سەرۆکایەتی
دیلان بەم شێوەیە دەبێت:
دیلان یەشیلگۆز: وەزیری بەرگری و جێگری سەرۆکوەزیران.
ئیلکۆ هاینین: وەزیری دارایی.
دەیڤد ڤان وێل: وەزیری داد و ئاسایش.
و چەندین وەزارەتی تری وەک کار، ژێرخان و تەندروستی.
دواتر دیلان یەشیلگۆز، وەزیری نوێی بەرگری و جێگری سەرۆکوەزیرانی
هۆڵەندا ڕایگەیاند" جێگەی شانازییەکی گەورەیە وەک وەزیری بەرگری دەستبەکار دەبم
بۆ پاراستنی ئازادی و ئاسایشی وڵاتەکەمان؛ لەم قۆناغەدا کە دەبینین ئاسایش و ئازادی
بەدەستنەهاتوون، کار بۆ بونیادنانی هۆڵەندایەکی بەهێز دەکەین کە بتوانێت ڕووبەڕووی
هەڕەشەکانی ئێستا و داهاتوو ببێتەوە و پشت بە تواناکانی خۆی ببەستێت، هاوکات بەوپەڕی
بەرپرسیارێتییەوە کار دەکەین بۆ پشتگیریکردنی ئەو ژن و پیاوانەی ڕۆژانە لە ناو هێزە
چەکدارەکاندا بەرگری لە خاکی هۆڵەندا و ئازادیی ئێمە دەکەن".
یەشیلگۆز سەرۆکی پارتی گەل بۆ ئازادی و دیموکراسی (VVD)ـیە و ئێستا
سەرپەرشتیاری تەواوی هێزە چەکدارەکان و سیاسەتی بەرگریی نیشتمانیی هۆڵەندایە.
دیلان یەشیلگۆز لە ١٩٧٧ لە باکووری کوردستان لەدایکبووە.
لە سەرەتای هەشتاکانی سەدەی ڕابردوو بەهۆی فشارە سیاسییەکانەوە لەگەڵ خێزانەکەی بەرەو
هۆڵەندا کۆچیان کردووە.بڕوانامەی ماستەری لە زانستە کۆمەڵایەتی و کولتوورییەکان
لە زانکۆی ئەمستەردام (Vrije Universiteit) بەدەستهێناوە.